Diamars marduga pasa di 2or un chauffeur bou influencia a causa un desaster den San Nicolas despues di a dal den un auto y cura di cas den Bernhardstraat.
E auto Mark X color preto cu number A-15886 maneha pa e homber G.W. di Papilon a baha caminda dal den un Cerato cora para dilanti di un cas. Pa motibo di e impacto a causa tambe daño grandi na un cura di cas den Bernhardstraat 256. A ranca meter di awa tambe. E habitantenan cu a spanta y lanta cu e sonido fuerte pasa di 2or di marduga, a sali y ora nan a habri porta di cas a mira con e chauffeur ta busca manera di huy for di e sitio. El a logra tambe pero no a yega Playa. Di San Nicolas el a bay abou den Bernhardstraat y djey pasa dilanti warda di Polis sigui bay abou. Polisnan di Santa Cruz tambe a activa mesora. Banda di Pos Chikito nan a topa cu e auto.
E chauffeur G.W. cu ta un trahador den Casino a keda deteni na e sitio. Polisnan a confirma cu esey ta e auto cu a dal den Bernhardstraat y core bandona e sitio. A confisca e auto mientras cu e chauffeur a wordo hiba den dogcatcher pa warda di Polis na Santa Cruz. Eynan a pasa e proceso di interogacion. E chauffeur a core cu wheel kibra mes bay direccion pabou. Polisnan na e adres den Bernhardstraat mester a pidi personal di DOW pa un cantidad di azeta cu a keda placa riba caminda direccion pabou. Tambe personal di WEB pa asina bin drecha e meter di awa cu a wordo kibra y tabata basha awa pa loco. Tur cu tur basta daño material a keda atras.
