Diasabra mainta a sosode un accidente riba e caminda di Caya Boes Orman cu ta ex Arendstraat. Polis a wordo manda pasobra hendenan a yama cu a scucha un sonido fuerte y despues a mira autonan kibra. Tambe nan a mira un homber cu sea ta bebi of e ta malo. Nan no por a splica exactamente kiko a pasa e chauffeur.
Tambe testigonan a mira cu un hende muhe a baha for di e auto y bandona e sitio. Polis na yegada a topa solamente cu e chauffeur cu ta un mucha homber. A resulta cu e no tin rijbewijs. E tabata para riba su pia y geleun na un auto para dilanti di e Supermercado Chines. Polis a bay atende cune y e tabata casi sak den otro pa motibo di ta hopi bou influencia di alcohol y yen di soño.
E tabata den un paranda basta pisa. Polis a trata di papia cune pero e no tabata comunica casi cu Polis. Prome cu e sak den otro eybou, Polis a purba pa e sinta. Finalmente nan mes mester a carga e hoben pone sinta pa asina warda riba ambulance tambe cu a wordo pidi pa presenta. A cuminsa investigacion mesora y a saca afo cu e hoben sin rijbewijs cu e Yaris blanco A-72788 tabata bayendo direccion pariba.
Poco pabou di e Supermercado Chines den Caya Boes Orman el a hala na man drechi chip e wiel di un Lancer para riba acera y sigui bin duro y finalmente baha caminda full na man drechi plama den un cura di cas y un pickup cu tambe tabata para dilanti di e cas. E auto mes a sigui draai rond y bay para mas leu mey mey di caminda.
E tabata coriendo hopi duro. Tabata tin cierto momento cu e hoben a medio bin bij y kier a tuma un actitud agresivo y Polis a atende cune mesora. Polis a chek di ken e auto ta. E ta pertenece na un adres na Sabana Basora. Despues di investigacion e hoben rin rijbewijs y bebi a wordo hiba den ambulance pa Hospital pa un chekeo. E team di Forensys a haci nan investigacion tambe pa seguro. Takelwagen mester a hala e auto Yaris for di caminda. Pregunta cu ta keda ta, Ken lo paga pa e gastonan causa pa e chauffeur bebi sin rijbewijs?
