Djasabra 18 di Ougùstùs, Curaçao Hospitality & Tourism Association (CHATA) ta organisá un Marshe di Trabou. Durante e Marshe di Trabou tur persona ku ta buskando un trabou òf ke kambia di karera por topa ku mas ku 25 kompania lokal ku ta buskando talento nobo pa nan kompania.
E kompanianan ku ta partisipa ta ofresé trabou den diferente área manera, e sektor di hospitalidat, sektor finansiero i sektor hurídiko. E partisipantenan tin mas di 100 vakatura di diferente nivel, for di un un stazje, te na un posishon di manager.
E marshe di trabou lo tuma lugá na Sunscape Curaçao Resort Spa & Casino di 11.00AM pa 6.00PM. Atmishon na e evento ta kompletamente grátis. Personanan ku ta buskando trabou ta keda enkurashá pa trese vários kopia di nan CV i pa nan prepará nan mes debidamente pa por papia ku por ehempel e HR Manager na diferente kompania.
Ademas, personanan ku bini e evento tin e oportunidat pa asistí na diferente workshop ku lo tuma lugá den kurso di dia. E workshopnan ta enfoká riba tipnan pa asina bo por haña e trabou di bo soño. Por ehèmpel, nos tin instansianan ku lo splika kon pa skirbi un bon CV, kon pa prepará pa un entrevista, i bo derechinan komo empleado riba e área di salario, dia di vakashon i CAO.
E kompanianan ku lo partisipa ta: Baoase Luxury Resort, Halabi Group, LionsDive Beach Resort, Avila Beach Resort, Hilton Curaçao, Acoya Curaçao Resort Villas & Spa, Morena Resort, CHATA, Scuba Lodge, CAP, Café Barista, Securitas, Ox & Wolf, Coral Divers, JCI, TUI, Kura Hulanda, Blue Bay Dive & Watersports, Coral Divers, Amazing Cleaning Services i mas.
Pa mas informashon tokante e Marshe di trabou tuma kontakto ku CHATA na 465-1005. I sigui CHATA riba Facebook na www.facebook.com/CHATACuracao
