Central American and Caribbean Amateur Swimming Confederation (CCCAN) lo ta na Aruba

Cuminsando otro siman diamars, nos dushi isla di Aruba lo ta pais anfitrion di un di e competencianan mas grandi teni den nos region.

Awe na Piscina Olimpico Roly Bisslik na Savaneta e directiva di Arubaanse Zwembond hunto cu e Comite Organisador a tene un conferencia di prensa pa asina informa nos comunidad kiko tur por spera di e competencianan di landamento e dianan 26 di juni pa 6 di juli na Aruba.

A hiba palabra Sra. Marion Kan, presidente di AZB, Sra. Esther Croes representante di e competencia di landamento artistico, Sra. Monica Platieu, representante di e competencia di landamento, Sr. Damian Maduro, representante di e competencia Open Water y Sra. Maureen Croes, secretaria general di CCCAN.

Campeonato di landamento internacional CCCAN na Aruba

Posted by 24ora on Wednesday, June 20, 2018

Mester bisa cu 26 di juni pa 6 di juli Aruba lo host e Central American and Caribbean Amateur Swimming Confederation, CCCAN lo conta cu un participacion di 479 atleta y 148 oficial deportivo procedente di 24 pais den e area di Centro America y Caribe. Paisnan participante lo ta Antigua-Bahamas – Barbados -Bermuda-Cayman Islands – Colombia-Costa Rica-Curacao-Dom Republic-El Salvador-French Guyana-Grenada-Guatemala-Haïti-Honduras-Jamaica-Nicaragua-Panama-Sint Maarten-Suriname-Saint Lucia-Trinidad-US Virginia Islands y mas cu claro Aruba.

Na e CCCAN lo competi den tres disciplina di e deportenan aquatico  esta landamento artistico, landamento y Open Water. E competencia di CCCAN lo inicia otro siman diamars 26 di juni cu landamento artistico y lo dura te cu diahuebs 28 di juni. Despues lo sigui cu e competencia di landamento cu lo ta e dianan 29 di juni pa 3 di juli. Lo culmina e competencia di CCCAN 2018 cu e competencia den Open Water Swimming cu lo ta riba dos dia esta 4 y 6 di juli. Diahuebs 28 di juni den oranan di atardi lo tin e Ceremonia di Apertura di e Central American and Caribbean Amateur Swimming Confederation, CCCAN na Piscina Olimpico Roly Bisslik na Savaneta. E competencia di Open Water lo tuma lugar na den e area di Mangel Halto y aki lo sera e caminda pa tur automobilista.

Pa loke ta e preparacion di nos atletanan den tur tres e disciplinanan esaki a bay super bon. Nos atletanan cu ta praktica e deporte aki ta conoci como esnan cu miho preparacion ta hiba pa cualkier competencia internacional sea ta den exterior of na cas. Nan ta entrena casi tur dia y tin biaha dos bes pa dia pa asina duna e miho prestacion posibel. Esaki mas cu claro ta conta pa e landadonan cu ta combina nan estudio y e deporte di landamento den exterior cu tambe lo bini Aruba y forma parti di nos seleccion di landamento

Mas cu claro Arubaanse Zwembond y Comision Organisador kier a yama un danki na tur e stakeholdersnan, boluntarionan, personanan directo of indirecto envolvi cu e competencia cu a yuda duna nan aporte cu awe Aruba por host un campeonato di e magnitud manera e Central American and Caribbean Amateur Swimming Confederation 2018.