Censo kier sigui acopla cu otro departamentonan

Despues di un aña 2017 cu a duna un resultado positivo den e trabounan realisa door di Censo, e plannan pa 2018 ta grandi, segun Sharin Luydens, director di Censo.

Un prioridad ta cu mester keda inverti den bo team, cu ta e punto central di cada organisacion. “Nos plannan pa 2018 ta pa keda pone enfasis riba e trahado. Nos deseo ta pa sigui educa nan, duna refreshment di leynan existente cu nan mester traha cu nan.”

Loke ta bay concentra tambe den 2o18 riba dje ta e acoplacion cu otro departamentonan cu mester informacion cu Censo tin na su disposicion y cualnan ta necesario pa haci nan trabou. Esaki ta algo hopi necesario, ya cu e ta permiti e ambtenaarnan haci nan trabou den forma mas eficiente. Intercambio di data semper tabata algo hopi necesario, principalmente si kier aumenta e eficiencia di departamentonan di Gobierno. E intercambio di informacion lo por duna e ciudadanonan eyfo un miho servicio.

Nan tin tras di lomba 16 proyecto cu a wordo realisa cu ayudo di Fondo di Desaroyo, y cualnan a encera entre otro digitalisacion di actanan bieu pa despues sigui digitalisa e actanan diario cu ta wordo produci. Luydens a splica cu unabes bo tin actanan digitalisa, no mester bay saca un copia den archivo y cu e cliente mester bolbe despues di algun dia of siman. E ta disponibel di biaha.

E sistema di KVS cu ta percura pa un miho distribucion di e clientenan. E ta permiti tambe pa maneha un organisacion den un forma hopi mas eficiente. Cu e 16 proyectonan a logra yega na un infrastructura completamente nobo pa haci tareanan den forma hopi mas eficiente, mehora e servicio cu ta wordo brinda. Den e aspecto ey Censo ta cla pa awor y ta e sistema aki ta permiti’e bisa di biaha cu den 2017 a entrega 143 mil uittreksel, sin conta esnan di HBK. Esaki ta algo cu por bay automaticamente entre e departamentonan y no ta haya 143 mil persona ta acudi na Censo pa un uittreksel. Pues tin manera pa baha e cantidad y sigui funciona den forma eficiente. Den e area aki kier bay concentra awor. “E lo mehora e servicio y sin esaki nunca por yega na un e-government.”

Director di Censo ta contento cu e ayudo cu nan a ricibi for di oficinanan auxiliar di Gobierno. Nan tin un averahe di 200 papel di 5 florin cu nan ta saca pa dia entre e 5 oficinanan, locual Censo su so ta entrega riba un dia tambe. E servicio cu HBK-nan ta duna ta un alivio, creando otro puntonan di distribuicion cu ta alivia e peso di Censo. El a aclaria cu e HBKnan no ta cay bou maneho di Censo, ya cu nan tin nan mesun hefenan cu ta cay bou di e Minister concerni. Solamente nan tin un mandato y conexion cu Censo pa duna e papelnan di 5 florin.