Castigo di prizon pa ex Minister corupto di Corsou

Awe mainta a bira conoci cu Corte na Corsou a declara Jacinta A. Constancia, Parlamentario di Partido MFK como culpabel. Un castigo cu tabata hopi menos di loke cu Fiscal mr. Out a pidi p’e. A pidi un castigo di 5 aña pero el a wordo condena na 20 luna di prizon, pero cu durante 5 aña e no por ocupa e funcion di Minister.

E sentencia di awe mainta ta final dje prome trayecto di e proceso pasobra despues di esaki e acusado por apela e castigo y hasta si e keda confirma den Corte Comun di Husticia, ainda e por bay Corte Supremo di Husticia na Hulanda manera cu su lider Gerrit Schotte a haci den e caso unda e tambe tin un condena di 3 aña pero no ta bay cera mientras cu e proceso ta den fase di apelacion y no a bira definitivo.

Fiscal a pidi pa absolv’e Constancia di estafa y labamento di placa pasobra no por proba esaki pero pa e cargo principal el a pidi 34 luna kitando e tempo cu Constancia a pasa den detencion preventivo. Su Abogado a pidi pa exonera su cliente completamente pero Hues a pone e peticion aki un banda.

E acusacion oficial contra Constancia tabata cu den e periodo di 1 januari 2012 te cu 9 di mei 2014 el a manipula criminalmente pa obtene fondo for di Stichting Buro Ziektekostenvoorzieningen (BZV) y a convence of ordena nan pa traha un cheque di ANG. 365.853,49 destina pa cumpra mondkapjes pa via cu tabatin preocupacion pa salud di clientenan di restaurantnan Chines pa motibo di e falta di higiena.

Pa loke te cargo di labamento di placa tanto fiscal como e abogado tabata di acuerdo cu no por acusa di esaki. E cargo di estafa si Corte a haya cu ta proba. Pa por a hustifica e suma di BZV, e conspiradornan a lanta un compania na Camara di Comersio bou dje nomber Chines Li Mei Wei y nan a habri un cuenta na Girobank. O sea, intencion claro di estafa comunidad. Nan a haci esaki sabiendo cu pa un fraccion dje montante ey nan lo por a cumpra e mondkapjes.

Resto di e placa tabata pa reparti entre e ex compañero di bida di Jacinta, Schoop y un otro complice. Pa colmo el a duna Schoop un suma grandi kende a uza e placa aki pa regala su amante. O sea, Jacinta ta bay cera awor pasobra el a organisa un estafa y gran parti di e cen a bay pa loke por considera su rival.

Ta Edzel Rosenda, kende tabata director di Aduana y despues a bira presidente di BZV a haci denuncia di e estafa. El a haci e denuncia pasobra el a ripara cu BZV a traha un cheque di ANG. 365.853,49. riba nomber di Li Mi Wei cu ta un negoshi di Gianni Henri Jose Benschop. Loke ta notabel ta cu e cheque ta riba nomber di Li Mi Wei pero e nomber ta diferente for di e compania cu nan a registra na Camara di Comercio. Notabel tambe ta cu su siguiente dia mes nan a cash e cheque. Anto pa supuestamente cumpra 40.000 mondkapjes cu ta costa 10 cen pa un!