Via un carta UV-17/17-18 di Parlamento di Aruba y firma pa Presidente mr. Juan “Ady” Thijsen, dirigi na Nelson “Speed” Andrade (Headlines Group), ta informe cu un mayoria den e “Senioren Convent” a dicidi pa prohibi su entrada den e edificio pa 3 luna largo. Cu e decision anti-democratico aki y un atentado contra libertad di prensa, a pone cu awe mainta mes nos a reuni cu abogado mr. David Kock, kende awo lo entama un caso sumario contra e decision aki.
Senioren Convent ta e lidernan di Fraccion di Parlamento y e Presidente di Parlamento, pues Rocco Tjon (MEP), Marlon Sneek (AVP), Marisol Lopez (POR), Ricardo Croes (RED) y Ady Thijsen. Den e carta ta bisa cu mayoria di e miembronan presente a vota na fabor di un prohibicion di entrada di un miembro di prensa.
Den un carta anterior a referi na e hecho cu a sinta den stoel di Presidente di Parlamento pa haci e noticia. Esey e Presidente a tuma masha na malo. Straña nos masha, pasobra ta custumber cu ki ora cu tin un dia publico den Parlamento, ta cantidad di hende ta sinta riba e stoel ey. Ehempel ta dia di huramentacion ultimo. Pero ta obvio cu e trio ey no a haya carta di prohibicion. Esaki claro ta prueba cu e decision ta mas bien persecucion politico y un intencion serio pa purba silencia prensa.
E otro motibo den e carta nobo manda awe ta cu Nelson Andrade, despues di e carta pa pidie pa mas cooperacion cu Parlamento, cu ainda el a critica e Presidente. Cu esey e “lo” ta mustra di no “lo” ta cooperativo y pesey ta prohibi’e di drenta e edificio.
Mesora awe mainta a reuni cu nos abogado, mr. David Kock y hunto a dicidi cu ta cuminsa un caso sumario contra e organo mas halto di nos pais. Ya cu e Presidente di Parlamento no ta capas di tuma decisionnan corecto, lo laga un Hues evalua si Parlamento por prohibi entrada di media den e edificio publico aki. Den pasado Gobierno di MEP tambe a yega di prohibi entrada di prensa den Bestuurskantoor y Hues a rechasa y anula tal decision.
Mester ta cla pa tur Minister y tur Parlamentario, cu e rol di Prensa ta pa sirbi como “watchdog” pa nos democracia.
Dor di purba silencia y prohibi nos di traha, cu cada un di nan ta cometiendo un golpi di estado contra nos democracia. Y pa ta cla pa tur, cu nos lo defende nos trabou te na e organo mas halto di ley. Awe lo manda un carta tambe pa Sociedad Interamericana de Prensa pa splica nan di e estorbo cu nos como miembro ta hayando pa eherce nos trabou.
Lo no permiti cu Gobierno, dor di no gusta nos tono y critica, cu nan ta cana e caminda pa laga cera miembronan di prensa dor di entraga keho FALSO y tambe dor di prohibi entrada di prensa den edificionan oficial di pueblo. Asina aki e Gabinete Wever-Croes lo por conta cu hopi problema cu prensa!
