FADA ta contento cu e siman aki ta bay pone tiki mas atencion pa loke ta e parti di alcohol, mirando cu nos ta den un temporada cu sa cu e consumo di alcohol ta hopi halto. FADA ta bezig cu su carousel na tur scol secundario.
Mayoria scol a acerca FADA y ta completamente in pa loke ta charla. Segun Rulienne Arends trahado preventivo na FADA, tur dia nan tin charla y e topico ta alcohol. Akinan nan ta duna e hobennan tools y conseho pa nan por tuma un bon decision y pa no bay bebe alcohol durante temporada di carnaval y pa warda nan edad. Asina mes tambe ta papia cu nan, una bes cu bo ta un adulto cu ainda tin peliger.
Arends ta enfatisa cu tin varios peliger cu ta bin cun’e, no solamente coremento bao di influencia, pero tin otro cosnan cu tambe por sosode.
FADA ta trahando hopi di cerca cu Fundacion Zinnia, DVG y KPA pa un proyecto cu no ta desconoci mas den comunidad di Aruba. Poco poco e ta bayendo. Tin di bisa cu mester di sosten di comunidad. FADA ta haciendo su maximo esfuerso, door di duna diferente informacion na comunidad, pero ta keda na tur hende tambe pa hunto, tene conciencia.
Manera cu a bisa den diferente ocasion, bo ta sali bay trip, palabra un rato ken ta esun cu ta bay ta pendiente di tur, pa asina por yega cas safe. E siguiente fin di siman un otro hende ta na beurt. Ta cambie asina ey, pa tur hende yega cas sano y salbo.
Corda cu abo ta bay trip, pero tin otro persona ta bayendo cas for di trabao y nan tambe kier yega nan cas safe. Mester corda tambe riba e otro personanan cu tambe ta riba nos careteranan di Aruba, no solamente abo, pero tur otro hende.
Pa loke ta carnaval, FADA ta bezig cu su carousel, pero ta purbando actualmente pa Amigo Didi forma parti di Carnaval. Tin SMAC cu ta apoya FADA tambe den e temporada aki. Ta bezig cu algun grupo di Carnaval pa wak cua di nan ta dispuesto pa bay cu e banner di Amigo Didi, pa asina nan tambe por forma parti di e paradanan, mientras cu tur hende ta gosando, diripiente bo ta mira e poster, unda cu bo ta. Bo por ta tiki mas conciente na e momento ey ainda. Esey tambe por yuda.
Segun Arends, nan ta desea tur hende pa disfruta di carnaval mirando cu e ta un temporada cortico, pero haci’e sanamente. Pero manera cifranan ta bisa, nos hobennan ta esun di mas vulnerabel pa loke ta e parti eynan. Nos mayornan, educadornan, docentenan di scol, mester ta ehempel pa e chikitonan.
Loke cu nan wak, nan ta bay haci. Pesey kier pone hopi enfasis riba mayornan, pa e temporada aki. Si bo tin pensa di bay bebe, wak cu bo yiunan ta rond di bo, nan ta mira loke papi y mami ta haci y dia di mañan, nan ta haci mesun cos. Ban ta e ehempel. Amigo Didi tey awor aki pa Carnaval y sigur pa e siguiente temporadanan tambe.
Bon reaccion riba carousel
Arends ta indica cu tin diferente instancia cu ta forma parti di e carousel. Cada un cu nan topico, pero poniendo enfasis riba carnaval. Pa loke ta FADA bo ta haya diferente scol, diferente reaccion di e hobennan. Algun di nan bo ta mira claramente cu nan ta compronde e mensahe y ta bisa tambe cu nan ta warda te ora nan yega e edad cu mester pa bebe. Pero bo ta haya semper den tur klas, algun hoben cu ta bisa bon cla y raspa, cu nan ta bebe. Nan a yega di bebe. Ora cu puntra nan na ki momento of con nan a yega na alcohol, ta tende nan bisa cu ta hay’e na cas for di mami, papi, un omo, un wela. Nan ta bisa na cierto eventonan nan a purba alcohol pa prome biaha, entre otro den Carnaval. Esey ta e reaccion di e hobennan y nan no tin miedo di bisa cu nan ta bebe alcohol of a yega di purb’e. Mirando unda cu nan ta cuminsa, na purba e alcohol, eynan tambe FADA tin cu bay traha un tiki duro. Tin ora cu ta punta dede riba nos hobennan, pero nan ta haya e ehempel di e grandinan. Esey ta un reaccion cu ta haya di practicamente tur scol cu FADA bay. Tin sigur un 3 pa 4 hoben cu ta bisa cu e prome biaha cu nan a purba alcohol tabata na cas.
Hobennan sa
E hobennan ta hopi sabi. Nan sa kico ta bon y kico ta malo. Pero tin diferente factor ta hunga un rol. Nan tin e peer pressure, nan kier forma parti di e grupo. Tabata tin un hoben cu a yega di comenta cu e ta mira hopi biaha na fiestanan di famia, e adultonan ta bebe, have fun y djis curiosidad, kier a sa kico e ta smaak, con e ta ora ta bebe alcohol y esey ta un motibo pakico el a bay bebe alcohol pa prome biaha.
Nos hobennan ta hopi conciente kico pasa ora bebe alcohol na edad jong. Mayoria ta conciente con hopi daño nan por haci na nan mes.
