Diabierna ultimo tabata tin e gran apertura di campeonato HEINEKEN 2018 di Aruba Softball Bond kende e aña aki a wordo dedica na dos baluarte den deporte Sr Wilbert “Wiwi” Maduro y Hyacintho “ Chin” Thiel.
Rond 7:15 di anochi, maestra di ceremonia Sra. Sandra Suarez Croes a yama un bon bini na tur invitadonan y tur presente y a haci apelacion pa tur e 15 ekiponan presente cuminsa drenta for di leftfield pasa tercera base crusa homeplate saluda fanatico y invitadonan y despues pasa primera base y bay para den cuadra. Mesora despues a yama Jaydiene Croes kende a resona e tononan di Aruba dushi tera.
Presidente di Aruba Softball Bond a sigui cu un tremendo discurso gradiciendo mas cu claro tanto Wiwi Maduro y Chin Thiel pa nan aporte y nan dedicacion y nan famia pa tur nan sosten y comprension. Alabes a splica cu deporte ta un vehiculo cual ta brinda nos e oportunidad pa desaroya nos talento pero ta siña nos disciplina, respect y ta kita nos hobennan for di caya unda hunto nos ta crea un miho nacion.
Paden di veld nos ta contricante y competi pa gana otro pero pafor di veld manera wega caba nos ta amigo y deporte ta yudabo hustamente crea amistad y networking. Despues MC Sandra a lesa e CV di baluartenan Wiwi Maduro y Chin Thiel unda nan a ricibi nan reconocemento oficial di Aruba Softball Bond.
Chin Thiel lamentablemente ta sufriendo di un kibrante di salud bastante serio y no por tabata presente pero Roy Geerman a tuma esaki den nomber. Yeritza Ras di Tanki Leendert Girls ta contesta 3 di e 4 preguntanan relaciona cu softball bon y ta gana e titulo di Madrina di aña 2018 den e contest pa madrina di aña 2018. MC a yama dos hoben dilanti esta Jean Marie Kock di Jaguars y Guyon Cannister di Royal Power pa lesa e “CREDO” di Softball. Un rato despues a bay over na “HURAMNETACION” di e cuerpo di Umpires unda Ronald Nicolaas tabata encarga cu e parti aki.
Prome cu a bay over na e parti oficial unda ta tira e promer bala pa decreta campeonato 2018 oficialmente habri, Presidente di ASB Endy Croes a pidi un minuut di silencio brindando respect na manager di Seleccion femenino y di e Team Campeon 2017 Aruba Bank kende Augustus 2017 ainda a biaha cu Seleccion pa Republica Dominicana, Lionel Richardson. Lionel Richardson 3 di Augustus ultimo a bay laga nos.
Mesora a continua cu e programa unda Wiwi Maduro kende tabata bon bateado pero alabes tremendo pitcher den su gloria a subi monticulo, Roy Geerman como bateador y asina a lansa e prome bala. Umpire ta decreta playball!! Campeonato 2018 a keda oficialmente inaugura.
Royal Power a hunga contra Piratas e prome wega di campeonato. Masha masha pabien Aruba Softball Bond deseando tur ekipo un campeonato exitoso.
Masha danki Wilbert Wiwi Maduro y Hyacintho Chin Thiel pa tur lokual boso a brinda boluntariamente na deporte en general y muy en especial e deporte di softball. Danki di curason!!!!!
