Diaranson atardi empleadonan di MetaCorp a topa na Club Caiquetio pa sigui cu e programa di MetaFit Caminata. E biaha aki e participantenan a cana y core e ruta di 5 KM.
Preparacion di e empleadonan p’e MetaFit Caminata 2018 ta continua fuerte, banda di un entusiasmo enorme, pa e evento cu ta tuma luga dia 1 di Juli proximo.
E proceso di training intensivo ta debi cu e participantenan ta determina pa termina e ruta completo den forma exitoso. Gerencia di MetaCorp ta participando na e caminatanan, mustrando sosten pa e importancia di salud pa cu nan empleadonan.
Manera ta conoci, anualmente e companianan cu ta bou di MetaCorp ta participa na un sin fin di eventonan riba tereno deportivo, saludabel, social y asina por sigui menciona. Di e forma aki e compania ta tene su empleadonan contento, motiva pero mas cu tur cos, saludabel pa nan mes y pa por brinda bon servicio na clientenan. Un empleado saludabel semper ta mas motiva y contento.
Pa loke ta e evento di diaranson ultimo, e participantenan a yega final contento di a logra nan meta. Ta gradici tur boluntario, representante di IBiSA, iRun, Patrishi Sports, Rode Kruis y Eric Gomez pa organisa un otro caminata y coremento pa nan por sigui prepara.
E siguiente caminata lo ta diasabra 16 di juni pa 6’or di mainta saliendo for di Sero Colorado y e participantenan lo cana y core sea 7KM of 12.5KM. E team dinamico di MetaFit ta invita tur empleado di MetaCorp pa sigui participa na e caminatanan.
