Awe Parlamentarionan a ricibi reaccion di CAFT riba e planan di Gobierno pa bini cu medida pa cubri nan prespuesto 2018. Locual ta resalta den e carta di CAFT ta cu Gobierno ta subi su gastonan en bes di baha nan. Specificamente cerca Minister Otmar Oduber tin un suma di 20 miyon florin aloca pa inversion den infrastructura. Esaki ta lanta un interogatorio grandi cu ta laga pueblo paga medida mientras ta aumenta gastonan en bes di reduci. Parti hopi grandi di e suma cu ta worde busca cu aumento di BBO ta worde aloca den un frega di wowo pa Minister Otmar Oduber haci inversion.
CAFT ta bisa: “De grootste kapitaalinvesteringen bedragen AWG 12 miljoen aan infrastructurele werken, AWG 10,5 miljoen aan projecten bij het ministerie van sociale zaken en AWG 6,7 miljoen voor andere projecten bij het ministerie van ruimtelijke ordening, infrastructuur en milieu”
Prome Minister Evelyn Wever-Croes pa hustifica medidanan a papia di crisisheffing y PPP mientras parti substancial di e placa ta bay pa inversionnan di Minister Otmar Oduber, manera ta sali na cla for di e analisis di CAFT.
Con partido MEP y POR ta splica esaki na nan votadornan ta bira intresante pa mira. Mientras cu simpatisadornan di MEP ta defende nan mes y nan partido utilisando e argumento di debe y PPP awe nan ta haya sa cu parti substancial di e medida ta bai pa financia exigencia di Minister Otmar Oduber.
Den cambio di presupuesto di 2017 por a mira esaki caba caminda Minister Oduber a exigi miyones extra y pa 2018 el a exigi 20 miyon segun e conseho di CAFT cu awe a keda publica. Practicamente henter e suma cu supuestamente ta pa crisis y PPP awor a resulta di ta bay pa Minister Otmar Oduber.
