Ta cada bes atrobe un hilaridad di mira con mandatarionan kier purba di hala atencion, pero sin ningun tipo di argumentacion valido. E mandatario di turismo por ehempel ta gaba cu un pier cu a wordo construi dilanti di un hotel y ta menciona riba tereno di salubridad con lo introduci un app pa controla e dokternan di cas.
E ta lubida sinembargo cu tin hopi critica riba e lista di espera y e trato na sala di emergencia na hospital. Y keto bay e mesun hendenan cu a comete actonan di corupcion den e “vernieuwbouw” di H.O.H. ta cana rond den e edificio y ta keda “wheel & deal” den e proyecto aki.
E mandatario di medio-ambiente ta haci uzo di medionan di comunicacion comprometi, otro cu esunnan di pasado, y di su “spin-doctors” cu ela contracta den Serlimar pa purba di hustifica su plan biyonario y macabre pa recohe y procesa desperdicio. Y su meta no ta pa clarifica su maneho, alcontrario su unico meta ta pa pone parlamento dilanti di un “fait accompli” y pa “brainwash” e pueblo. No tin awa pa laba. “It is his way or the high-way”. Y pa colmo uzando aki atrobe placa cu no tin pa traha e promocionnan aki y pa pasa nan na television y otro medionan.
Otro mandatario cu ta haci declaracionnan, cu ta remarkabel, ta e Prome-Minister. Den un declaracion ta acusa Citgo cu nan tin Aruba secuestra y den un habri y cera di wowo e ta brasa cu e mesun secuestradornan aki. Kico tin anto, Citgo tin Aruba secuestra si of no? Prome-Minister ta reacciona contento cu porfin Citgo lo cuminsa inverti den e “upgrader” cu un suma “astronomico” di 35 miyon dolar. Cuanto di e 35 miyon dolar aki lo bai den e companianan cu nos tur sa cu ta propiedad di Mike de Meza? Awor si e contracto strangulante cu 20 parlamentario a aproba ciegamente ta bon? Of tin hendenan cerca di un mandatario cu ta den servicio di e compania di Mike de Meza?
E mandatario sinembargo cu ta “span de kroon” den su empeño pa acapara atencion ta e Minister di Labor. Ela fulmina contra e departamento di labor, insinuando yen di actonan dudoso pa bay caba como un fruminga y ta baha cabes pa SEPPA. Unda e famoso investigacion a keda? Normalmente prome cu bo haci declaracionnan publico y pio ainda acusa hende, bo mester tin prueba contundente cu ya caba mester a conduci na sea bay Ministerio Publico of at least cuminsa cu un acto di suspencion of terminacion di trabou via e departamento di Recurso Humano.
A acusa e Management Team y algun otro empleado di DPL di a otorga “ontheffing”, anto e ora ey e pregunta ta surgi cuanto “ontheffing” e Managment Team a duna? Di e “ontheffingen” aki cuanto tabata cu conseho positivo y cuanto di esakinan a wordo aproba pa minister Glembert Croes?
Ta un “cheap-shot” di parti di e minister di acusa e Management Team di a otorga “ontheffing”. Te leeuw cu ami sa, como ex-mandatario ta e minister ta esun cu ta firma pa e “ontheffing”, y ningun otro hende. Y ta e ta esun cu al final ta responsabel pa esaki tambe. Alabes segun mi cu ora cu ta manda un “afwijzing”, e ora ey e minister no kier ta e “boeman”, e ora ey si DPL mes por mande pero despues cu e minister bai di acuerdo cu esaki. Pues aki tambe kier ta populista.
Parce cu e ta “shoot first and ask questions later” ta na ordo di dia. Pero mi por compronde e motibo pakico e mandatarionan ta recuri na e modus operandi aki. No tin vision! Y despues di 9 luna ainda e baby no a nace. Pues mester cuminsa desvia atencion y e forma predilecto ta priminti y no cumpli. Esaki ya caba a wordo demonstra durante e campaña electoral di 2017 na unda a priminti cielo riba tera y cu nan si tin un solucion, pa despues bin cu e excusa cu a hereda un situacion mas dificil di loke a premira of cu pasobra ta trata aki di un coalicion. Esaki nos ta yama “cheap shots”.
Algo cu a hala nos atencion ta e hecho cu Minister President a bisa cu no por entrega e presupuesto na ora pasobra tin problema cu e aspecto di personal. Dicon? Asina hopi hende a wordo tuma den servicio den e ultimo 9 lunanan? Ta interesante pa sa, si tin TRANSPARENCIA, pa pueblo sa cuanto cada minister a nombra y na unda y cu si tur ta presenta na trabou. Segun nos informacion tin algun “periodista” ta cobra pero no ta presenta na pia di trabou.
Si e situacion ta asina malo cu mester a masacra e pueblo cu e “crisisheffing”, con por hustifica cu tantisimo hende a ser tuma den servicio den e aparato gubernamental sin papia por ehempel di e decenas di hendenan cu ser tuma den servicio na Serlimar?
Pues e conclusion cu por ser saca despues di 9 luna di e gobierno “POR-RED-pober mep” ta cu nada a cambia. Fantocheria, manipulacion ta na ordo di dia, acusacionnan sin base pa tapa incompetencia, tigernan di papel, spin-doctors etc etc, cu otro palabra pachanga ta sigui sin cu e pueblo ta wordo invita pero cu e mesun pueblo aki al final ta esun cu mester bai paga, sino ta “links om” lo ta “rechts om”!!
