Empleadonan di e compania Bonaire Peteoleum Corporation (BOPEC) a lanta awe for di 7:00am den welga, blokiando entrada y salida di e terminal di petroleo riba e isla di Flamingo. E accion, conduci pa nan sindicato, tin di haber cu e incertidumbre cu ta bibando bou di e empleadonan pa cu futuro di e compania. Nan ta demanda contestanan concreto, tanto na nivel di gerencia como tambe di Gobierno Insular di Boneiro.
E retonan na BOPEC a inicia ora cu Gobierno di Hulanda a duna nan un ultimatum te cu dia 5 di januari 2018 pa corigi algun asunto di siguridad den e planta di abastecimento. Si BOPEC no cumpli, chens ta grandi cu lo stop operacion di e compania.
Esaki ta trece cune dos reto. E prome ta e mas di 300 empleadonan cu ta trahando sea directo of via contratista eyden. E di dos ta cu BOPEC ta entrega e “Heavy Fuel Oil” cu ta uza pa procesa coriente na Boneiro.
E problemanan a inicia ora cu Inspectornan di Hulanda a revisa e planta y a emiti un rapport cu basicamente ta bisa cu e planta no ta cumpli cu medidanan di siguridad y cu e instalacionnan falta hopi mantencion.
Pa logra esaki, Gobierno di Hulanda ta estima cu e compania mester inverti mas o menos 40 miyon dollar. Pa cuminsa, Hulanda kier mira e 40 miyon dollar riba e cuenta di banco di BOPEC prome cu dia 5 di januari 2018, pa garantisa cu nan por cumpli cu e cambionan desea.
BOPEC ta existi pa 42 aña caba y ta pertenece na PDVSA. Su trabou ta pa almacena petroleo den tankinan cu tankeronan di tur parti di mundo ta pasa eynan pa carga. Semper e compania a pertenece na PDVSA di Venezuela. Nan ta bisando cu tin placa pero cu e cuentanan di PDVSA internacionalmente ta “gefreese” cu consecuencia cu no por move e fondonan necesario. BOPEC ta cumpra y bende “Heavy Fuel Oil” cu e compania cu ta produci coriente pa WEB na Boneiro tambe.
E sindicato ta sinti falta di gerencia di BOPEC pa duna cara, PDVSA cu ta keto y Gezaghebber di Boneiro mes, kende lo a bisa cu e tin un “Plan B” den caso cu para operacion di BOPEC pero ainda no a menciona kico su plan ta.
Cu e realidad ey riba mesa, awe 2 di januari, faltando 3 dia pa e ultimatum impone pa Gobierno di Hulanda, trahadonan a dicidi di bay den accion y pone trabou abou y a blokia entrada y salida di e instalacionnan di BOPEC. Nan a bisa di lo no stop te ora haya contesta satisfactorio di futuro di nan trabou.
