Kico e bijstand ta nifica. E ta cubri e necesidadnan. Tin biaha ta sinti cu e placa aki ta destina na alcohol of ta cumpra droga of e bendedo di droga ta para pafo pa cobra e placa cu nan debe. Glenda Hernandez, directora di Asuntonan Social, ta splica cu bijstand no ta destina pa soluciona y biba di dje completamente.
E ta un ayudo ora cu bo ta den un crisis financiero, door cu bo a perde trabao of bo no a haya trabao. Den esey Gobierno ta yudabo, door di duna un sosten. Departamento di Asuntonan Social ta asumi cu e famia tambe ta yuda cu e resto di placa pa por biba. Den e sentido ey e no ta algo cu mester ta permanente pero e ta algo temporario, te ora cu bo por bin bek riba bo pia. Cu otro hendenan ta haci uzo of maluzo di esaki, esey ta jammer, pero e ta pasando den e sosiedad aki, pero ta algo cu ta drenta den e bida personal di e persona. No ta apoy’e, pero esey ta lamentabel. Ta constata cu ta fenomenonan cu ta pasando den bida real na Aruba.
Contract di bijstand
E persona ta wordo yama si tin algun cambio. Tambe ta haci un control. Wak si en berdad e placa ey ta husto locual cu e ta haya. Si haya tip via via cu e bijstand eynan ta solamente un entrada cu e ta trahando, ta bay wak, ta bay papia cu e hende wak si e ta berdad y ta invit’e pa papia riba locual cu a haya como tip of locual cu a haya como hecho riba mesa. E ta asina cu ta haci un investigacion na momento cu haya tips cu e placa ey no ta wordo bon destina of cu a parti di e placa ey tambe tin otro entrada.
Paga bek
E persona mester paga bek si mester gara e hendenan. Semper DAS ta keda alerta pa e cuenta eynan. Bijstand no mester ta un zakgeld extra apart di e trabao cu tin caba of cu a haya despues. Esey no ta e proposito pasobra e ora ta uza eigenlijk placa di comunidad na un mal manera. Esey ta depende di kico ta bo norma y balornan cu placa di comunidad. E tey pa yudabo temporariamente, si bo kier tum’e acerca y traha, hopi biaha ilegal, esey ta toch na dado momento, ta haya sa y ta tuma medida.
Mamanan soltera
Tin biaha ta sinti cu tin mamanan soltera cu tur aña nan tin un yiu nobo, siendo cu nan mes no tin manera pa sobrevivi. Dado momento nan ta keda traha yiu, nan no tin trabao, mas yiu nan traha, mas placa nan ta haya. Segun Hernandez, naturalmente nan ta haya casonan asina. Den esaki bo ta haya toch e pregunta si bo ta drenta den un bida priva di un hende door di puntre cuanto yiu e mag di haya of no. Den esey ta haya cu ta bida priva di e cliente. Naturalmente ta cuestiona e caso pero mester sa cu mas bijstand a base di yiu, tin un limite na cuanto yiu bo por haya y e montante maximo cu bo por haya na bijstand. E ta keda un liña toch sensitivo. Hulanda ta mas estricto cu esey. Nan ta lik op stuk.
