Siman pasa y dialuna atardi reunionnan a tuma luga pa mira con por soluciona precupacionnan di companianan chikito cu tin ekipo pisa cu a sinti cu nan no a wordo teni na cuenta den construccion di Watty Vos Boulevard. Esaki ta loke Minister di Infrastructura Benny Sevinger a bisa durante un conferencia di prensa dialuna mainta.
E titular di Infrastructura a bisa cu personalmente e no sa si e protesta di siman tabata politicamente motiva, pero igual e por bisa cu e preocupacion di e ciudadanonan aki ta uno real y valido. Gabinete Mike Eman II sigur ta semper para na e banda di e trahadonan y hustamente pa esey a opta pa stimula economia pa medio di proyectonan grandi cu durante ultimo shete aña a pone contratistanan local grandi y chikito haya hopi trabou. Di mesun manera ta dispuesto pa sinta na mesa y traha hunto cu tur partido envolvi pa yega na un solucion satisfactorio.
Ora di Destaho Publico, e mandatario a splica, semper ta pone un provision ora di proyectonan grandi manera di Green Corridor y Watty Vos Boulevard pa duna preferencia na trahadornan local. Pa loke ta material no ta pone ningun specificacion, pasobra cualkier compania cu gana un bid mester tin su mesun ekipo y esey semper ta e caso. Di otro banda, si haci uzo di sub contratista den e proyectonan, nan tambe mester dispone di nan ekipo pisa.
“Hopi hende ta hayando trabou y apenas e proyecto aki a start. Contratista grandi y chikito ta bay haya trabou cu e proyecto aki,” Minister Sevinger a bisa. “Tur proyecto tin dos meta, e prome ta pa mehora nos pais, y e di dos ta pa crea trabou pa nos hendenan.” Sevinger ta considera un hipocrecia cu ta hustamente esnan den oposicion cu a vota contra e proyectonan, awe ta prome para den rij pa exigi y instiga.
Minister Sevinger a indica cu a papia cu directiva di Mota Engil cu ta e contratista principal di Watty Vos Boulevard y nan a demostra di ta dispuesto pa pone nan ekipo un banda y usa e ekipo di companianan local te unda cu por. Mescos cu a sosode cu Green Corridor caminda varios compania local a haya contract, mescos lo sosode cu e proyecto aki.
