E politico Benny Nisbet tin masha problema cu e forma di bisa algo den campaña y haci otro den gobernacion. E ta referi na partido MEP cu durante henter campaña, aunke nan tabata sa di e problemanan financiero di nos pais, toch a priminti un gobernacion sin medida. Pero awo, prome cu a yega 100 dia na mando, prome cu a caba di investiga kico a pasa, ta dicidi di anuncia un pakete financiero caba yena cu medida riba lomba di pueblo.
Pa e politico cu a encabesa partido PPA e ultimo decadanan aki, cu a sinta den puesto di Parlamentario y di Minister, e asunto aki ta inaceptabel. Es mas, Benny Nisbet ta reconoce cu e no ta forma parti di Gobierno of coalicion, pero e lo sigui vigila y cuestiona tur locual no ta corecto. El a subraya cu na Aruba nos ta biba den un estado di derecho y como tal e ta liber pa expresa su opinion.
Benny Nisbet e ultimo añanan a bira mas conoci riba red social cu den medianan tradicional. Regularmente e ta expresa su opinion riba Facebook, mayoria biaha contra Gabinete Eman II pero awor tambe cuestionando e coalicion Wever-Croes. Si tabatin un percepcion mes cu PPA ta uni cu MEP, esey sigur el a garantisa awo di no ta asina. PPA ta critica e practica conoci di MEP di tuma medida asina cu drenta Gobierno, mientras a priminti otro.
Benny Nisbet a splica den su publicacion riba Facebook cu e no mester di ningun instituto Hulandes of local pa conte di e realidad financiero y e retonan existente. El a sigura cu tur partido, MEP tambe, tabata sa di esaki for di den campaña. Pero nan a opta pa gaña pueblo cu nan tin solucion pero awor ta demostra di no ta asina y ta recori na bay cartera di pueblo.
Cu e movecion strategico aki, PPA ta sigura cu si bin un tumamento di medida y pueblo rechasa, locual ta sosode normalmente, e partido cu mishi cu su cartera, cu entoso caso PPA no lo haya culpa ni falta di e medidanan aki.
Mester menciona cu eleccion na September 2017, partido PPA a uni forsa cu UPP di Booshi Wever. E ultimo aki no a bisa nada ainda despues cu MEP a anuncia cu lo bin cu un pakete financiero pa mehora situacion di Gobierno.
