Diadomingo despues di 6:00pm Polis a bay un cas situa na Ponton pa atende un dama cu su casa ta maltratand’e. Na yegada a topa cu e homber basta bou influencia di alcohol, pa cual Polis a detene. Tambe pa motibo di maltrato. Su casa a bay Hospital pa ricibi tratamento medico pa e slanan ricibi.
Polis tin un departamento special cu ta atende cu e tipo di problemanan asina, pa garantisa cu no ta pone tur atencion riba e sospechoso, pero tambe ta duna mes of mas atencion na e victima.
Personal di Slachtofferhulp a pone nan mes na altura, pa mira situacion di e señora. Den casonan asina, ta conseha e victima pa entrega un keho oficial na Recherche, pa asina por cuminsa cu un investigacion formal. Dor di entrega keho, e abuso ta bay den “file” di e sospechoso y despues di tanto caso of si e haci algo pio despues, semper Hues por tene cuenta cu su “record”.
Lamentablemente hopi bes e victimanan ta opta pa no entrega keho, pasobra e homber kisas ta tata di nan yiu, ta paga tur gasto den cas y asina por sigui menciona. Ta nota tambe cu asina un homber cuminsa maltrata su pareha, casi semper e lo sigui y e muhe ta hay’e ta biba un bida di abuso fisico pa hopi aña. Tin biaha e abusonan ta bay mas leu y por resulta na maltrato pisa of te hasta morto.
Ta dor di denuncia e tipo di actonan asina so por yuda para abuso y percura pa e abusadonan ta siña di nan eror, sinta den un prizon, cu ta duna nan suficiente tempo pa pensa riba locual nan a haci y pa den un forma duro, siña cu “man no ta pa dal!”
