Ban yuda Kyrenne Croes yega Colombia pa tratamento

Julissa Hoevertsz ta vocero di famia di Kyrenne Croes y e ta parti tambe di e famia. El a splica cu dia 27 di Februari 2017, Kyrenne a haya su mes envolvi den un accidente hopi serio na Paradera, na altura di Great Rich. Desde e tempo eynan famia mester a carga un cruz hopi pisa pa busca salud di Kyrenne. Na momento di e accidente, Kyrenne tabata den un situacion critico. Locual cu mediconan na e momento ey a categorisa como braindead.Si bay bek actualmente, hopi cos a sosode, pero Kyrenne no a haya ayudo di AZV pa bay den exterior pa busca su salud. Despues di algun luna den hospital, mayornan mes a percura pa Kyrenne na cas y cu nan propio forsa financiero a paga pa therapie, cu consecuencia cu Kyrenne awe a sali parcialmente for di coma y ta comunica den un forma simpel, pero e ta reacciona. Si puntra Kyrenne algo, e ta contestabo cu su wowo of ta preta su mannan. Tin reaccion. Contrario na loke cu dokternan a bisa inicialmente, cu e no lo bay biba. Cu e no lo scapa esaki. Kyrenne ta fuerte y el a mustra lo contrario.

Ley di AZV

E ley di AZV no ta bezig ta trahando pa Kyrenne, pero Kyrenne su tempo pa busca ayudo medico ta yegando un momento critico. Loke a sosode siman pasa ta cu Kyrenne su celebro a yena cu vocht y dr. Vallejo, kende mayornan ta paga como particular pa wak Kyrenne, a conseha nan cu mester haci un operacion urgente cu Kyrenne pa saca e likido for di su cabes y esey a sosode parcialmente e siman aki.Pero, en conexion tambe cu dokternan na Colombia, cu tambe tin e dossier di Kyrenne, cu a wak e situacion y a conseha pa manda Kyrenne inmediatamente Colombia, a bisa cu Kyrenne mester bay pa haci un operacion na su cabes. AZV a nenga di paga gasto di transporte y di operacion, cu consecuencia cu si no haci e operacion, e no lo biba mucho mas y esey no kier. No kier cay den un buraco, pasobra e leynan ta prescribi un of otro. Bida di hende akinan ta mas importante. Ta compronde cu ley tey pa un motibo. Cu e ley tey pa proteha AZV. Pero den e caso aki, esey no ta yuda e pashent cu nada. Den e caso aki tin un pashent ya caba cu ta 10 pa 11 luna na cas, cu mayornan ta cubriendo tur gasto y gastonan medico ta haltisimo. Imagina e esfuerso di e mayornan, kico tur nan mester a haci, fundraising, ayudo di famia, ayudo di amigonan, pa por cubri gasto di Kyrenne. Ta yega cierto momento cu no por mas. Pesey ta sumamente urgente pa Kyrenne biaha pa Colombia e siman aki, pa e por haci e operacion na su celebro. Sino lo tin consecuencianan serio y severo pa Kyrenne. E situacion ta critico, segun Hoevertsz.

Recaudacion di fondo

Diasabra ultimo mayornan a tene un recaudacion di fondo masal, pidiendo Aruba, suplicando Aruba, pa por fabor, pone man na curason y yuda pa por manda Kyrenne Colombia pa inicia, pa cuminsa cu su tratamento. Famia y amigonan voluntario tabata para na tur rotonde den nan uniform. Ta sumamente urgente pa e por yega Colombia. No ta conta cu ayudo di AZV. Lamentablemente no ta conta cu ayudo di Gobierno. Tur hende, manera ta bisa, nan man ta mara. Pero e bida di Kyrenne, un mama hoben di 25 aña, ta na peliger. E ta colga mey mey di e ley di AZV y tur burocracia di Gobierno y AZV.Esey no por, segun Hoevertsz. Kyrenne no ta e prome cu ta pidi ayudo pa bay den exterior. Si e leynan keda manera cu e ta, e no lo ta e ultimo. Suplica tambe ta bay na Gobierno pa tira un bista riba e leynan di AZV pa esey no sosode cu ningun otro persona mas di e pais aki. Nos tur ta paga, nos tur ta contribui na AZV y merece e trato medico cu nos merece y ta paga pe.Famia tin mester pa hiba Kyrenne Colombia y pa cuminsa cu tratamento, $50 mil dollar y ta hopi placa. Famia mes a hinca hopi placa caba aden. Tin algo poni un banda, pero no ta yega pa por cera e placa aki pa hiba Kyrenne Colombia.Nos tur mester por yuda pa Kyrenne ricibi e tratamento cu e merece y ricibi ayudo medico cu e merece. Esun cu ta desea pa haci un donacion via di banco. Awor aki ta bezig ta lantando un fundacion, pero tin un cuenta di banco di mama di Kyrenne, ta disponibel. Number di cuenta ta 3291928. Esaki ta na RBC, bao di nomber di Lysbelia Arends. Si tin cualkier pregunta of informacion riba Kyrenne mes of si tin placa cu bo kier pa famia pasa cerca bo na cas, number di cel ta 7418566.