Balashi knights a pasa den lama bruto

93
CMB – Mobile Banking Nobo
RBC Mortage
E Hefe DMAX
E-Seminar 550×110

Diabierna anochi ultimo, e riddernan den domino, esta Team Balashi Knights a pasa den un lama basta bruto cu a sorpresa nan total ora cu Team Biba Lekker a cuminsa pone poco golpi den nan escudo!!! Tabata un encuentro hopi spera entre dos team durisimo cu a tuma lugar den e unico Domino Square Garden na mundo, esta 99 Bar & Restaurant na Calabas.

E-Seminar 300×250

Mientras cu poco poco partisipantenan ta yega, por a reconose varios caranan conosi den mundo “high-tech” di domino cu seña “wireless”, manera e notorio “Indio”, e teror di tur sangura conosi como “The Exterminator”, e famoso gambler “Yo-Yo”, y e unico guy cu ta huma su contrincantenan cu tabaco tamaño 20 x 4! Si bo link dos di su tabaconan na otro cu’n cadena memei, bo ta laga Bruce Lee su nunchaku chikito y bo tin un arma mortal! Pues shonnan, dos ekipo supuestamente “bush-league”, pero pata pata di trabuconan “estrellita del Norte” of “Extremista” den nan filanan!

E bataya ta cuminsa cu’n Biba Lekker mal rabia ta sorpresa Balashi Knights picando dilanti cu score di 4-1!! Mes ora pafo di 99 Bar, Balashi Knights ta arma un mesa cu durante wega lo bira e Centro di Procesa Seña, caminda den forma rapido estilo CIA, seña nobo nan ta wordo desaroya! Den corto tempo por observa cu e centro special aki a cuminsa duna resultado, ya cu den rat’i ora Balashi Knights ta pasa Biba Lekker voorbij y ta drenta half time comodamente cu score di 11 – 6!!

Despues di a disfruta di e super sabroso snacknan di 99 Bar & Restaurant, segundo tempo ta drenta aden caminda ta parse cu Team Biba Lekker a disidi di cambia nan “life style” di “lekker leven” y a cuminsa desifra e señanan “wifi” di Balashi Knights y alavez bin cu’n paar di seña crioyo di nan mes! Bou grito nan di emocion, Team Biba Lekker ta score wega tras di wega y un Domino Square Garden rand rand di fanatico ta keda babuca con Biba Lekker ta tuma un bentaha di 18 – 14!!! E escudonan di e riddernan di Balashi ta hayando slanan duro style di Machikaaaaa!!! Pafo e Centro di Procesa Seña ta “zoem” mescos cu’n neishi maribomba brabo, y locual lo pasa despues lo laga fanaticada ainda mas babuca! Balashi Knights ta manera hinca man den caha fuerte y saca un buki di seña nobo, ultra secreto, y di tipo “next level”!! Increiblemente Balashi ta pone Biba Lekker tira un anker na 18, y den forma superior ta habri “nitro” ranka bay pa gana cu score di 21 – 18!!! Un Biba Lekker traumatisa ta keda wak rond mescos cu yuwana cu nan a rosa su mondi!!! Otro anochi fenomenal di domino na 99 Bar & Restaurant!!

Ken lo ta siguiente? Team Snor? Wel wel, den un entrevista exclusivo, Snor Perez a declara cu prome su team rebaha su nivel enfrenta Balashi Knights, esakinan tin cu cana nan caminda prome, gana mas ekipo, prome cu e lo considera di duna nan un chance! Shonnan keda pendiente pasobra cos ta birando hot n’e unico Domino Square Garden na mundo, 99 Bar & Restaurant, net n’e grens entre Calabas y Kudawecha!!!

Comments

comments

Dragon Fly
Aruba Bank Mega Smart Car Purchase