Ta for di algo pasa di 2’or di merdia cu a bati alarma pa un baby cu no ta duna señal di bida na un crèche situa na Catiri # 12-H. Mester menciona cu ambulance a transporta e baby pa Hospital pero su tras a start cu un investigacion mesora pa determina kico a sosode cu e baby no tabata duna señal di bida mas. Un rato despues a drenta informacion cu a baby no a sobrebibi y cu Dokter a constata morto di e mucha muhe J.A.V. Kelly, naci dia 21 di december 2017. E baby pues tabatin solamente 2 luna di bida.
For di e sitio a constata cu na e mesun cas ey ta mira pa varios baby. E formula aki ta conoci como crèche, di cual mama ta pasa mainta laga baby pa e por bay trabou y atardi ta pasa buske bek. Mayornan ta confia cu nan criatura ta keda den bon man y cu e personal eynan ta bon entrena, prepara y cu experencia pa atende cu babynan recien naci, di cual mester HOPI wowo riba nan.
Informacion cu a yega na nos ta indica cu probablemente pa un descuido, e baby a stik cu su lechi! Recherche awor ta investiga con esaki ta posibel. E lidernan eynan a bisa cu despues cu nan a duna e baby lechi, el a bira blauw y no tabata duna señal di bida. Nan a bay den panico y a bati alarma mesora. Ta necesario pa lidernan den creche tin conocemento pa duna “reanimacion” den tipo di casonan asina, pasobra e lo a yuda.
Tata di e baby ta un Douanero. Fiscal a tuma e curpa di e baby den beslag. Nos ta expresa palabranan di condolencia y hopi forsa na famia. E baby tin dos ruman mas.
