Si bo haya accidente y e specialista cu ta tratabo na Aruba ta bisa cu locual e tratamento cu bo mester despues di accidente ta di tal forma cu aki na Aruba no por haci’e, AZV ta cubri pa bay den exterior.
Den e casonan manera esun di Kyrenne, e punto ta cu e parti di reactivering y/of revalidatie, no ta ziekenhuiszorg. AZV ta cubri ziekenhuiszorg. Si bay un clinica den exterior cu ta haci reactivatie, un sorto di verpleeghuis, esey no ta wordo cubri pa AZV.
Normalmente si mester cierto tratamento medico, specialista, un cardiologo, of cualkier specialista y e ta suficiente usual y coriente, aunke cu e causa tabata un accidente den trafico, bo ta wordo manda den exterior. AZV ta cubri’e.
Director di AZV, Anko Ringeling, a splica cu e conferencia cu nan a yama pa duna mas informacion relaciona cu e caso di Kyrenne Croes, mester ripiti cierto informacionnan. E conferencia aki ta un di e intento pa informa e pueblo. Riba nan website nan tin suficiente informacion. Tambe nan ta saca nan revista Pulso cu ta duna informacion riba kico nan ta cubri. Tin biaha ta saca propaganda, pero aparentemente mester keda ripiti esaki.
Nazorg
Si Kyrenne Croes no a haya e accidente, nan no a haya e problema cu e tin awor aki. Awo unda e cuido di AZV ta caba y kico ta e criteria cu tin cu uza cu no ta cay bao di AZV mas. Ringeling a splica cu e caso di Kyrenne Croes no ta unico. Tin mas caso. E tratamento cu Kyrenne Croes mester, por wordo distingui den dos tipo di tratamento. Uno ta tratamento di un specialista medico. Cerca AZV no tin ningun problema cu esey. Locual e mester, cu e por haya, ta wordo cubri y segun AZV e por wordo haci na Aruba tambe. E otro parti pa pashentnan manera Kyrenne, ta e reactivering y revalidatie. Esey no ta wordo haci pa un specialista medico. Bo ta haya bo mes cu por ehempel fisioterapistanan, ergoterapistanan. Tipo di profesionnan asina. E ta wordo haci den un setting, cu no ta un hospital, pero un verpleeghuis. E verpleeghuiszorg, SABA, no ta cay bao di AZV. E no ta algo cu ta cubri. SABA ta wordo financia, subsidia directamente door di Gobierno. Tabata tin discusion. No a sigui e discusionnan aki ainda cu e minister nobo. Tabata tin discusion pa laga e verpleeghuiszorg bin cay bao di AZV tambe. Pero esey no a wordo concretisa ainda. Una bes cu esey ta bay sosode, e ora ey locual cu mester sosode den verpleeghuiszorg, entre otro e reactivering/revalidatie pa tipo di pashentnan asina, cay bao di AZV y lo percura tambe cu dentro di SABA tin espacio pa bo atende pashentnan asina.
Na e momento aki e no ta cay bao di AZV. E ta cay directamente bao di gobierno, gobierno ta subsidia SABA. Te ainda SABA ta mas dirigi riba hendenan grandi pa nan haya un cama eynan, den un manera di bisa. Pero segun Ringeling, SABA, y nan tambe ta dispuesto pa desaroya su mes den e direccion ey, cu SABA por tin un rol tambe pa pashentnan cu mester wordo reactiva of revalida.
Aruba ta un pais relativamente chikito y esey ta pone cu un politico, un minister ta wordo directamente confronta cu cualkier tipo di caso asina, cu ta pone basta presion riba dje. Ora cu a traha e ley di AZV, Ringeling tabata director di Asuntonan Social un tempo, y e tempo ey, tur dia un stapel grandi di dossier tabata wordo hiba bestuurskantoor pa e minister concerni pa e firma, ken ta bay haya un carchi di dokter e tempo ey, PPK. Den e discusion cu e tempo ey, esnan cu a traha e ley, e politiconan, staten, Gobierno a hiba, ta pa bisa cu juist e tipo di desicion eynan, pa no lag’e den nan man. Pa lanta un organo independiente pa tuma tipo di desicionnan. Es decir, directamente pa casonan individual, manera Kyrenne of sra. Ling of Baby Lunah, e minister no ta dicidi. Esunnan cu a traha ley, a traha cierto garantianan tambe den e sistema cu si un persona no ta di acuerdo cu e decision cu e organo ehecutivo tuma, cu e por apela su caso. E por bay LAR, e por bay hues, pa apela su caso, locual hendenan a haci, por ehempel e mayornan di baby Lunah. E ora e ta como si fuera un minister por ehempel, no kier yuda, pero esey no ta e caso. Directamente e no ta e minister ta tuma e decision, sino e organo ehecutivo.
