Awe ta tuma luga reunion entre Venezuela y Reino Hulandes

For di inicio di siman caba, na momento cu a anuncia cu a blokia tur vuelo aereo y conexion maritimo entre Venezuela cu Aruba, Boneiro y Corsou, cu mesora a start tramitenan pa regla e asunto aki. Gobierno di Corsou den forma proactivo y profesional a yama e Consul di Venezuela aden pa atende riba e medida aki. Aki na Aruba, Premier Wever-Croes a duna declaracion na Prensa Hulandes bisando cu nos tin como 12 mil Venezolano ilegal scondi na Aruba y cu ta pensa pa mas facil manda nan Boneiro.

Despues di un bay bin di declaracionnan fuerte for di Gobierno Venezolano, e Secretario di Estado di Hulanda a hala orea di Aruba y a cataloga e declaracion di Minister Presidente Evelyn Wever-Croes como “onhandig”. A organisa, for di Ministerio di Relacionnan Exterior di Hulanda un reunion na nivel politico entre Venezuela, Hulanda, Corsou y Aruba. Ta sperando binmento di un of mas Minister di Venezuela, e Embahador di Reino Hulandes na Caracas, Ministernan di Corsou y Aruba pa na final sali for di e impasse aki.

E reunion lo tuma luga awe den dia den Cocolishi mes, na e cede di gobernacion di pais Aruba. Siguridad lo ta halto den e area aki awe, debi na presencia di alto mandatarionan Venezolano, Embahador y Ministernan di Corsou. E mandatarionan Venezolano lo yega awe den avion Militar Venezolano na e aeropuerto priva, pa asina atende e reunion cu Reino Hulandes, representa awe pa Hulanda, Corsou y Aruba.