Conseho di Minister lo mester tuma un decision definitivo awe riba e maneho cu lo hiba pa cu Venezolanonan, specialmente despues cu Nacionnan Uni, via nan oficina UN Refugee Agency, a emiti un guia den cual ta urgi paisnan pa trata Venezolanonan como “refugiado”. Pa Aruba esey ta nifica cu mester otorga e mas di 10 mil Venezolanonan permaneciendo ilegal na Aruba un “firma liber” pa nan por keda y traha riba nos isla. Tambe e ta encera cu Venezolanonan cu yega pa pidi permiso di trabou por keda y traha na Aruba mientras ta sperando e permiso sali den forma definitivo. Claro, cu pa yega na un situacion asina, e Minister mester anuncia su maneho, pa cual awe e ta buscando sosten di Conseho di Minister.
E situacion aki no ta data di awe, sino for di algun aña caba. Na entrada di Evelyn Wever caba como Minister Presidente el a menciona di mester atende cu un problema latente di riba 10 mil Venezolano ilegal na Aruba. E tempo ey a pensa cu e cifra ta mucho halto pero e realidad ta, si suma e cantidad cu a drenta y desconta locual a sali, esey ta e deficit cu ta keda atras. E otro realidad ta cu e hendenan aki tin hopi tempo caba y a ingresa den e proceso laboral, pues cu economia ta cargando nan, sea na trabou of un famia/amigo ta percura pa crianan.
Awe Conseho di Minister mester dicidi ribsa kico lo sosode awo den cuadro di e maneho nobo, despues cu Nacionnan Uni ta pidi paisnan bisiña di Venezuela, pa trata nan como refugiado. Esaki ta un realidad nobo den e proceso andando pasobra e ta cambia henter e maneho di detene nan y deporta nan for di nos isla. Tambe e por crea un impresion cu mas por bin pasobra Aruba ta percura pa nan por haya un alohamiento y trabou. Maneho di porta habri tin consecuencia pa e mercado laboral local. Pero keda sin haci nada lo hinca Aruba den un problema cu Nacionnan Uni, relaciona cu derechonan humano.
Cu e realidad aki, e Gobierno nobo y specialmente e Minister di Integracion, mr. Andin Bikker tin un decision pisa pa tuma aki cu lo por trece hopi critica na ambos banda.
