Desde 1 di juli 2018 tin diferente cambio cu a incorpora den e ley di BBO y BAZV. Den e sistema di impuesto di Aruba a inclui un impuesto nobo, esta e ‘Belasting op additionele voorzienigen PPS-projecten (‘BAVP) cu un tarifa di 1,5%. E tarifa di BAZV a subi di 2% pa 3%. E tarifa di BBO a keda 1,5%. En total e BBO/BAZV y e BAVP a bira 6%. Banda di e adaptacion di tarifa tin algun otro cambionan incorpora. E Asosacion di Conseheronan di Impuesto (AVvB) ta spera di por duna un splicacion cu ta aclarea e sistema di cobransa di e BBO/BAZV/BAVP cual ta na vigor tanto prome y despues di 1 di juli 2018.
E tipo di impuesto
BBO, BAZV y e BAVP introduci recientemente ta tiponan di impuesto cu ta cobra riba e volumen di benta cu e empresarionan ta realisa den cuadro di nan empresa of profecion pa duna servicio of entrega di producto na Aruba. Como volumen di benta ta considera e total di e compensacion cu e empresario ta haya, incluyendo e BBO/BAZV/BAVP cu e empresario a cobra e cliente, pa e servicionan duna y productonan entrega den e cuadro di su empresa. E unico diferencia entre e BAZV y e BBO/BAVP ta cu e BAVP ta un cobransa destina (‘bestemmingsheffing’) cual ta nifica cu e impuesto no ta bay pa caha general di Gobierno sino ta destina pa e fondo di AZV.
Notificacion riba e factura
Na momento cu a introduci e ley di BBO na 2006 tabata poni den e concepto di ley un prohibicion pa menciona e BBO riba e factura. E tempo ey e sector comercial a protesta contra e prohibicion aki y asina a saca e prohibicion for di e ley definitivo. Esaki ta ensera cu a base di ley actual e empresario ta liber pa dicidi si e kier pone e BBO y awo e BAVP riba e factura/bon of no. Contrario na esaki, pa e BAVP (cual ta un cobransa destina) si tin un obligacion pa ley pa e empresario menciona e BAZV cu ‘e mester paga’ na Departamento di Impuesto riba e factura/bon. Tambe en caso e empresario ta cobra e BBO/BAZV/BAVP na su clientenan y kier menciona esaki riba su factura/bon, e mag di duna e BBO/BAZV/BAVP un otro nomber, por ehempel ‘sales tax’, ‘tax’, ‘impuesto’, ‘heffing’.
Tarifa
E empresario ta liber pa dicidi si e ta cobra of no cobra of cobra parcialmente e 6% ‘cu e mester paga na Departamento di Impuesto’ na su clientenan. Cu tin empresarionan cu ta cobra un tarifa diferente, por ehempel 6,38% tambe ta permiti. Por ehempel, door di cobra e porcentahe di 6.38% e BBO/BAZV/BAVP cu empresario mester paga na Departamento di Impuesto ta wordo carga completamente door di cliente. Esaki ta un decision di e empresario, cu ta permiti pa ley.
Conclusion
A base di e ley actual, empresarionan tin e libertad pa dicidi con nan kier cobra e BBO/BAZV/BAVP y na cual tarifa nan kier cobra nan cliente. For di punto di bista di e cliente esaki por trece confusion, si cada empresario trata e BBO/BAZV/BAVP na un manera differente. Ta keda e ora na cada cliente pa dicidi cerca ken e ta haci compras.
