Momentonan despues di a haci entrega oficial di lista di candidato di Partido di Pueblo Arubano pa Eleccion Parlamentario 2017, lider di AVP Mike Eman a sali for di edificio di Censo pa sigui celebra cu e multitud di simpatizante wardando riba Plasa Padu. Mey mey di hopi grito y entusiasmo pa e momento importante tras di lomba y pa mirando e apoyo masal di e sostenedornan di AVP, Eman a afirma cu “E 15 tabata riba caya awe.”
Cu esaki e lider politico ta referi na e 15 asiento den Parlamento cu e partido berde ta bay cune den e eleccion di dia 22 di september, un meta cu ta cada bes mas factibel mirando e reaccion di parti di pueblo. Eman a bisa, den un transmision en bibo pa television, cu Aruba ta brasa e trabounan cu e partido a haci durante 8 aña.
“Aruba ta brasando e lista nobo, e ekipo nobo cu nos a presenta cu ta bay percura tambe pa e retonan cu ainda mester wordo resolvi na e pais aki y pa e progreso cu tin cu continua pa Aruba por sigui padilanti,” lider di AVP a declara cu hopi emocion; bisando acerca cu: “Awe e pueblo a demostr’e den masa, cu e 15 a subi caya.”
