Recientemente e maximo autor Arubiano Quito Nicolaas a biaha pa Rumania, unda el a participa na e festival di Curtea de Arges. Despues di varios aña cu e ta ser invita y pa motibonan di otro compromiso no por a atende e festival aki, e aña aki si esaki a bira posibel. E festival internacional aki cu a tuma lugar di 12 – 18 di juli a conoce presentacion di poetanan di e.o. Argentina, Bolivia, Brasil, Colombia, Ecuador, San Salvador, Spaña, Venezuela, Israel, Egipcio, Arabia Saudita, Tunisia, Turkia, Canada, Estados Unidos, Serbia, Croatia, Rumania, Bulgaria, Austria, Portugal, Ciprus, Scotland, Antigua, Aruba y Puerto Rico. E festival Curtea de Arges ta selecta su invitadonan a base di nan publicacionan y merito riba tereno literario.
E programa di e festival tabata uno hopi pisa cu tabata cuminsa mainta tempran y ta sigui te traimerdia, pa atardi 6’or continua atrobe te anochi 21.30 pm. Durante e festival tabata tin diferente presentacion di buki y exhibicion di otro publicacionnan di e Academia Internacional Oriente-Occidente. Como forma pa bautisa e Antologia di 589 pagina – cual ta inclui tambe e poesianan di Nicolaas – e autor mester a declama for di e buki. Cada autor tabata ser introduci door di un presentadora, kende ta lesa su biografia y lista di publicacionnan. E poesianan cu ser declama tabata ser traduci simultaneamente pa un traductora den e idioma Rumano. Na inicio di su estadia sr. Nicolaas y su coleganan a ser ricibi pa e Alcalde di Curtea de Arges, mientras na final el a ser ricibi pa e Arzobispo di Arges y Muscel. Riba Diadomingo a inclui un programa cultural-historico, unda a bishita e region di Carpata y anochi a clausura esaki cu un recital di bailenan tradicional Rumano.
Autor Nicolaas a ricibi un gran acohida di parti di e.o. e representantenan di America Latina. Den su dialogo cu e otro participantenan di Israel, Egyptio, Scotland, Croatia, Turkia y Estados Unidos por a dialoga encuanto di literatura di nan pais y esun di Aruba. E conocido poeta Quito Nicolaas a sa di conmove e publico cu su poesia ‘The Statue’(E Estatua) y tambe cu e poesia ‘Servitud’ cu ta trata e transformacion di un sistema comunista/autoritario pa un sociedad mas moderno y liberal. E poesia ‘Servitud’ no ta un poesia nobo, si no ta uno saca di su tomo di poesia ‘Destino’ (2000). Cu su splicacion y aplicando esaki riba e caso di Rumania, el a ricibi un momento largo di aplauso. Cu e presentacion di sr. Nicolaas na Rumania, Aruba por ta sigur di ta tin un embahador cu a sa di transmiti e cultura y literatura Arubiano pa un publico internacional.
