Automobilistanan tene cuenta cu ciclista riba caminda

Aruba Wieler Bond kier a informa tur automobilista pa tene cuenta cu e siguiente informacion:

Diadomingo 18 di februari, e pre-selecion di ciclismo di ruta di Aruba Wieler Bond (AWB) bou guia di e entrenador nacional sr. Gabriel Diaz lo wordo someti na un competencia di prueba. E prueba ta start 6:30am, saliendo for di Colony rumbo pa Light House y regresa bek pa Colony.
E ciclistanan lo hasi uso di e careteranan via Brazil, Franse Pas, Bringamosa, Urataka, Sero Pita, Jaburibari, Alto Vista, Noord, West Punt Arashi y ta tuma e mesun careteranan pa regresa Colony.

Pa e seguridad di e ciclistanan durante e prueba, e caravana ta wordo guía pa un vehiculo principal (leadcar), algún scooter y otro auto. E ciclistanan lo ta riba e ruta entre 6:30 y 9:30 am. AWB ta pidi tur automobilista pa tene cuenta cu informacion y pa purba na tur momento pa considera e seguridad di e hobennan ciclista. Un suplica ta bai na tur automobilista pa regula nan velocidad, y pa ta atento pa ciclistanan riba e ruta. Boso cooperacion pa sigui e guia di e voluntarionan ta di gran importancia pa e seguridad di e ciclistanan cu lo ta continuamente riba e ruta, coriendo riba velocidad halto.

Tur ciclista merece e oportunidad di por practica nan deporte den un forma sigur y liber di peliger. Tene na cuenta cu lo tin hobennan tambe participando na e prueba aki cu ta di suma importancia pa e desaroyo di e ciclistanan di e pre-selecion di AWB

AWB ta gradici tur automobilista di antemano pa nan cooperacion. Pa mas informacion di e actividad organisa pa AWB, incluyendo informacion di e rutanan y distancianan cu lo wordo cori, por manda un email na [email protected].