Diasabra, pa mas of menos 10’or y 35 di anochi, patruya di Noord a wordo manda na altura di e luznan di trafico na Palm Beach, caminda cu lo tabata tin un auto para mey mey di caminda. Na yegada di patruya, nan a bin haya un Toyota Yaris color di oro, numera A-64701 den e posicion aki. Polis a bay papia cu e chauffeur, kende a splica cu for di mainta e ta trahando, e tabata cansa y cu el a pega soño tras di stuur. Mirando esaki, polis a dicidi pa escolta e cabayero aki te su cas, pa asina e percura e yega sano y salbo.
