Auto a ranca palo di luz y drenta mondi p’abao di brandweer

Diasabra, den careda di 6’or y 50 di atardi, un chauffeur coriendo un Toyota Passo color blauw, riba e caminda di Hato direccion Tanki Flip, a bay pasa un auto, pero no a paga tino cu tin auto biniendo di direccion contrario y a drenta bek e fila. Cierto momento e Passo lo a dal tras di un Honda Civic color blanco y a perde control. El a ranca un palo di luz, pa despues para p’abao di un palo di kwihi pazuid di caminda, na altura di e kazerne di brandweer. E chauffeur a sali ileso for di e auto. Polis di trafico a presenta na e sitio, pa asina tuma informacion di e accidente. Presencia di ambulance a wordo pidi, mirando cu e chauffeur tabata keha di dolor na su pecho. Daño material ta considerabel.