Auto a alcansa peaton y bay lage atras na Papilon

Diadomingo anochi prome cu 11:00pm a sosode un accidente na altura di Papilon pabou di 88 Food Store. Aki un auto a alcansa un peaton crusando caminda y bandona e sitio despues, lagando e victima herida atras benta riba caminda. A manda Polis y Ambulance urgente na e sitio pa brinda asistencia.

Na e luga di desgracia a topa berdad cu un homber herida na suela. Parce cu despues cu e auto a dal’e y move mesora di e sitio, a yega un auto cu tabata biniendo for di Sabana Grandi cu a topa e meneer aki benta riba caminda. El a para pa evita cu otro auto lo atropeya e victima un biaha mas.

E victima tabatin sla na cabes y tabata sangra pisa. E tabata keha tambe di hopi dolor na diferente parti di su curpa. Aunke e tabatin cap na cabes y rasca tur rond di su curpa, toch Paramediconan a saca afor na e sitio cu su situacion tabata stabiel.

Un ambulance bayendo Hospital cu un pashent no mucho grave, a pasa na e accidente pa brinda prome asistencia, mientras cu tabata sperando yegada di un otro ambulance pa por a transporta e victima pa Hospital pa ricibi tratamento medico avansa.

Na e sitio a start un investigacion mesora pa deduci ken a dal e peaton cu auto y sigui core despues. E practica “hit & run” tin ora ta parce un trend na Aruba, pero e ta contra ley y hasta castigabel, specialmente ora laga heridonan atras. Lo scucha testigonan awor y pa e peaton mes purba corda ki modelo di auto a dal’e, color y eventualmente number di auto tambe.