Diamars ultimo nos a informa cu Minister Andin Bikker lo tin un decision importante pa tuma, despues di un sugerencia di UN Refugee Agency di Nacionnan Uni. Ta trata aki di nan sugerencia pa atende Venezolanonan aki como “Refugiado”. Obviamente e Minister ta confirma di a haya e carta, e ta confirma cu a sugeri e asunto di refugiado, pero toch e ta considera nos noticia como “Fakenews”! Probablemente e no ta mucho versa riba e tema aki ainda.
E realidad ta cu Nacionnan Uni a pone varios scenario riba mesa, manera ta otro opcionnan den forma di un maneho migratorio mas suave pa Venezolanonan den cual ta regla un Visa Humanitario pa e grupo aki.
Manera ta conoci, varios ta pidi pa Asilo Politico, locual Aruba no ta otorgando. Ta purba tur forma pa logra un status pa garantisa estadia riba nos isla. Pa nan, e situacion na nan pais no ta facil, specialmente pa rasonnan di salud, pa trabou, pa persecucion, pa alimentacion y asina por sigui menciona. Asina mes Aruba no por carga cu e problemanan aki, siendo nos mes un isla chikito cu hopi limitacion.
Pero, na momento cu Evelyn Wever a asumi e puesto di Prome Minister, el a duna di conoce den Prensa Hulandes cu na Aruba tin mas o menos 12 mil Venezolano ilegal. Ta na e grupo ey nos tabata referi cu sin duda lo presenta mesora pa busca permiso, den caso cu Gobierno cambia su maneho di integracion pa Venezolanonan. Di otro banda, e grupo ey ta na Aruba pa algun luna caba, si no ta aña, pues ya caba ta integra di un forma of otro.
Aunke cu Andin Bikker a anuncia cu no tabatin decision di Ministerraad (contrario na nos informe for di den Cocolishi) toch Prome Minister Wever a convoca un conferencia di prensa pa atende e tema importante aki diahuebs mainta. Cu e sugerencia di Nacionnan Uni, Aruba mester tuma un posicion. Andin Bikker a anuncia su posicion caba cu e no ta bay cambia su maneho. Di otro banda, un otro canal di noticia a publica awe cu por lo pronto lo no deporta Venezolanonan mas di Aruba. Nos ta consciente di e decision ey siman pasa ora cu a cera fronteranan, pero despues cu aerolineanan a cuminsa bula bek, parce cu a cambia di decision atrobe y ta deportando ilegalnan atrobe.
Awe nos lo haya sa mas concreto kico Gabinete Wever-Croes ta dicidi riba e tema delicado aki, pasobra nos ta consciente cu politicamente e ta causa poco critica, pero e ta un realidad cu no por kita for di dje tampoco.
