No ta mucho dia pasa varios auto a wordo kibra na altura di Sultan na Cumana. Ta parce cu el a bira un trend cu ken cu ta cu para su auto na e luga aki of den vecindario, ta haya un sorpresa desagradabel. Ultimo un dama su tas a wordo horta for di bahul. Awe, esaki tambe tabata e caso. Algun minuut pasa di 10’or di anochi, malhechornan a kibra den un MG SUV y un Toyota Yaris. Cada un auto na e bentana na banda robes. Doño di e vehiculonan a bay den tur nan comodidad pa pasa un rato agradabel, pa despues haya un sorpresa asina. For di e Yaris, ladronnan a bay cu un tas di trabao, cu aparatonan medico den dje y for di e MG, ladronnan a bay cu un tas cu tur pertenencia personal. Sinembargo, a laga un laptop atras. Polis y seguro a presenta na e sitio pa asina tuma dato di e sucedido.
