Diahuebs awor un delegacion den e deporte di taekwondo lo sali pa Costa Rica, unda nan lo competi den e nuebe edicion di e Pan American Junior Kyorugi Championship y e Open di Costa Rica. Nos atletanan lo competi den diferente categoria mientras e atletanan Chiara Petrocchi y Charrick Winterdaal lo competi den e edad di 15 – 17 aña. Ambos atleta a caba di atende un campo di entrenamento intensivo na Sagamosa, Colombia unda nan a permanece pa tres siman y entrena hunto cu e seleccion di Colombia. A traha duro riba e tecnica y tactica di e deporte mientras a spar y bringa cu diferente contrincante di nivel halto.
Tur esaki tabatacomo preparacion pa e Weganan Sur Americano Hubenil 2017 cu lo tuma lugar fin di luna di September na e ciudad Santiago capital di Chile. Mester bisa cu e competencia aki ta bon pa cu e preparacion pa e ODESUR Hubenil. E delegacion lo wordo guia pa e coach nacional di taekwondo, Sr. Teofilo Rodriguez. Na 2016, e atleta Chiara Petrocchi a logra medaya di plata den e Costa Rica Open G1. Pa e delegacion di taekwondo sigur lo bay ta un experiencia grandi mirando e magnitud di e evento aki.
Un danki sigur na Lotto, e Loteria di Aruba pa medio di Comision di Subsidio cu a yuda subsidia e biahe di e atletanan Chiara Petrocchi y Charrick Winterdaal pa e Open Taekwondo Championship 2017 na Costa Rica.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
