Aruba Softball Bond a prepara un selecion desde Februari pa un campeonato di CONSURSA cual a tuma lugar na Monteria Colombia e promer dos simannan di Juni.
CONSURSA pa promer biaha den historia tabata tin un campeonato di un nivel super halto cu 11 pais participando cu un total di 220 atleta bon prepara garantisando cada pais 10 wega minimo den e promer ronda. E Alcalde di Monteria Sr. Marcos Daniel Pineda a duna nan maximo cooperacion den gran forma pa por a realisa e campeonato aki usando un total di 3 stadion. No obstante cu Aruba no a logra clasifica den e 4 mihornan pa bay playoff Aruba a logra gana 3 wega contra Peru, Brasil y Argentina mientras Aruba a perde weganan preta cu entreotro Panama (2-1), Ecuador (1-0), Venezuela cu a titula campeon (5-3), Colombia cu a termina na di 4 puesto ( 4-2) pa nombra algun. Venezuela ta derota Argentina den e gran final pa titula campeon mientras Republica Dominicana kende a clasifica na promer lugar cu 10 victoria y 0 derota ta wordo derota dos biaha den page system playoff contra Argentina y Venezuela y a caba na di 3 lugar. No obstante esaki CONSURSA na final di e evento a saca hungadornan cu a destaca individual durante henter e torneo.
Paisnan tabata hopi impresiona cu e progreso di Aruba y henter torneo por a scucha palabranan di elogio di dirigentenan grandi manera di Argentina, Cuba, Venezuela, Republica Dominicana pa e softball cu Aruba a brinda primordialmente den su defensa y pitcheo cu a impreciona. Aruba ta logra 3 Medaya individual. Di ful e torneo a saca e “Best Infielder” cual premio a bay pa Jason Orman cu a fildea 10 partido impecable den short combirtiendo algun hungada sencacional na momentonan crucial como out.
Contra Colombia ta backhand un bala cu etiketa di hit y ta rifla home pa saca un out importante. Contra Argentina ta saca un out na segunda y bira tira home pa coy e coredor cu a ranca bay home y asina por nombra algun hungada. “Best First base men” di henter e torneo a bay pa Kelvin Silvania kende alaves a conecta e cuadrangular di mas leew di e torneo contra Cuba di alrededor 375 pia.Filbert Thiel tambe a conquista un medaya como e “Best outfielder” di e torneo cu algun hungada sencasional sin comete ningun error. Giandrick Lacle a sali na di 2 lugar tras di un hungador di Venezuela cu 10 RBI unda e Venezolano a bay cu e medaya cu 11 RBI. Aruba ta progresando y a gana e respet internacional.
ASB ta gradici Subsidie Commissie, Coaching Staff, Delegadonan Chipen Chirino y Andresito Krozendijk, sponsersnan y tur cu a duna nan granito di arena pa por a realisa e biahe aki y mas cu klaro nos atletanan kendenan a hunga cu amor grandi pa nan patria batayando te final cada wega. Pabien na Jason Orman, Kelvin Silvania y Filbert Thiel cu na medaya individual cual sigur ta un logro grandi pa Aruba unda individualmente Aruba a gana mas medaya cu tur otro pais. PABIEN!!!!!
