Aruba su atleta elite den e deporte di atletismo, Quincy Breell a sali pa Londres, Inglatera unda e campeonato mundial di atletsimo IAAF lo tuma lugar. E atleta Quincy Breell lo competi den e disciplina di Salto Largo y lo wordo guia pa su coach Miranda Nedd.
Prome cu su baymento pa Europa, Quincy a sigui un entrenamento basta intensivo y pa un periodo di 4 luna na Arizona, Merca unda e la desaroya su mes mas miho riba su disciplina y a logra yega serca di su marca personal. E la entrena cu e grupo di Merca y mas cu claro Quincy lo bay hasi tur su esfuerzo pa supera su marca personal mientras awor e la bula 7.68. Na banda di e campeonato mundial e atleta Quincy Breell ta preparando su mes fuertemente pa yega na e clasficiacion pa e Weganan Centro Americano y Del Caribe como tambe e Weganan ODESUR. Ta bon pa bisa cu na banda di e competencia e atleta Breell a postula su mes pa drenta di e comision di atleta di IAAF durante di e 51 edicion di e congreso di IAAF na Londres.
Actualmente Quincy ta e unico atleta elite di Aruba den e deporte di atletismo. Varios biaha e la representa Aruba den exterior mientras den e Weganan Panamericano di 2015 na Toronto, Canada, e atleta Quincy Breell a keda na di ocho lugar den e clasificacion overall cual tabata un resultado historico pa Aruba. Un danki sigur na Lotto, e Loteria di Aruba pa medio di Comision di Subsidio cu a subsidia e biahe di coach Miranda Nedd cu lo guia e atleta Quincy Breell den e IAAF World Championship na Londres, Inglatera. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti
den deporte local pa medio di donacionnan na e Comision di Subsidio
