E siman aki a tuma luga un Innovation Summit organisa pa Gobierno di Aruba / Ministerio di Asuntonan General cu ta carga e tema di ‘innovacion’ riba nivel gubernamental. Durante dicho conferencia CEO di A.T.A., Ronella Tjin Asjoe-Croes, tawata. un di e oradornan invita y a cubri e tema di ‘Tourism as a Catalyst for Innovation’.
E presentacion a cubri diferente topico, y a refleha entre otro riba e importancia di turismo, cu ta e entrada principal di Aruba su economia, pero tambe riba con dinamico e industria aki ta mirando cambionan rapido riba area di entre otro variacion den gusto y preferencia di e consumidor, tecnologia, area politico pero tambe cambionan economico. Destinacionnan cu ta agil, cu por ahusta rapido y cu por maneha innovacion debidamente ta sigur gana tereno den e mundo dinamico di turismo. A subraya e importancia di esaki tambe considerando con competitivo e industria aki ta; e industria di turismo ta un di e industrianan mas grandi mundialmente, cu ta conta pa 10.4% di e GDP global cu ta percura pa mas cu 313 miyon cupo di empleo, y cu ta un di e industrianan cu ta creciendo rapido. No ta sorpresa cu ta mira mas nacion ta eleva e importancia di turismo como parti di nan ingreso economico. Na Aruba, e contribucion di biahe y turismo ta percura pa 86.5% di nos entrada (GDP) y ta forma 87% di e total di empleo na nos isla.
Durante e presentacion a comparti con por lo general innovacion ta nace pafo di e mundo di turismo, pero con por lo general den e industria aki ta test y implementa varios producto of servicio innovativo den tempo corto. Turismo ta wordo categorisa como un industria cu por catalisa innovacion. Esaki sin duda ta e caso pa Aruba, mirando e hecho cu pa Aruba turismo ta e industria mas grandi. Si stimula actividadnan innovativo pafon di e industria turistico mes, tambe den un caso asina mester sigura cu e ta link na e industria aki cu ta considera como parti cardinal di e exito di productonan / servicionan innovativo, mirando e cantidad di clientenan potencial cu esaki ta representa – serca di 1.8 miyon bishitante pa aña pa locual Aruba ta ricibi ora agrega turistanan crucero cu turistanan ‘stay-over’. Turismo ta asina integral na e biba na Aruba cu ta clave tambe pa introduci aspectonan cu ta cuadra cu tendencianan mundial indicativo pa cu e direccion cu turismo ta move den dje. A mustra consecuentemente un video cu e top 10 tendencianan actual cu ta varia di e abilidad di por ta bon conecta durante un vacacion (tecnologia) como tambe e deseo di por experencia mas di locual ta haci e destinacion autentico (por ehempel pa medio di su cuminda), pero tambe e importancia cu esnan cu ta biaha y cu nos planeta su humanidad ta pone riba proteccion di medio ambiente y recursonan natural.
Den e contexto aki Sra. Tjin Asjoe-Croes a indica cu hopi di locual ta importante pa e bishante actual y di futuro ta aspectonan cu nos comunidad tambe a indica di ta importante pa nan, y esaki ta bunita pa wak! Mehoracionnan ta sirbi ambos e industria y tambe nos cu ta biba aki. Esey pa A.T.A. ta importante.
Pa A.T.A. innovacion ta clave y a presenta varios ehempel di proyecto cu A.T.A. a pone su dilanti pa ta e prome pa introduci esakinan den Caribe y asina ta un innovador den e region aki. Ehempelnan ta inclui: e carchi di imigracion online cu a lansa na december di 2015, tambe e MoU cu a cera cu Airbnb na 2016, unda Aruba tabata. e prome pa a haci esaki. Aki a para keto si na e hecho cu A.T.A. no tin full control riba proyectonan cu ta representa innovacion y cu ta esencial pa colabora cu otro entidadnan y cu innovacion mester carga un compromiso berdadero di tur envolvi, si kier ta exitoso! Den e caso di e online immigration card y di e MoU cu Airbnb, e cooperacion cu e departamentonan gubernamental tabata. hopi bon, pero den e caso di e MoU cu Airbnb, no a logra e obhetivo final, esta pa ta e prome den Caribe cu tin un ‘partnership agreement’ cu Airbnb. Esaki lo a sigura entre otro cu pagonan di impuesto door di esnan cu ta huur acomodacion bao di capa di Airbnb- lo a wordo paga door di Airbnb. Aruba te cu dia di awe no tin esaki, y otro den Caribe si a cera esaki. Aunke cu tin reto pa cu aspectonan asina ki, compromiso berdadero lo a duna e prioridad necesario na e acuerdo aki y ta sigur cu lo a conduci probablemente na e meta final.
A duna diferente ehempel di innovacion bao di maneho di A.T.A. den e area di mercadeo internacional. Entre otro Aruba tawata un di e prome destinacionnan den Caribe pa adopta e ‘Programmatic TV Advertising’ na Merca, un manera/sistema cu ta permiti pa conoce/scoge e audiencia cu ta wak television na cierto momentonan di dia y sigura cu ta nan ta wak e promocion di Aruba y no otro cu no ta cay den e segmentonan riba cual Aruba ta dirigi su mes. Ademas, 60% di e esfuersonan di mercadeo di nos destinacion a wordo transferi pa canalnan digital/on line media ya desde 2011/2012 cu no ta usual tampoco pa cu otro den Caribe. Tambe a para keto na e www.aruba.com nobo y e hecho cu A.T.A. a instala / ta instalando diferente ‘beacons’ riba nos isla.
Accionnan concreto di innovacion clave pa cu Aruba su turismo ya ta difini, y ta inclui den e plan ‘Cu Mira pa Futuro’, como tambe den A.T.A. su plan strategico pa 2018-2021. A mustra esaki durante di e presentacion.
A.T.A. di su banda lo sigui enfoca riba ta innovativo ambos pa loke ta riba area di mercadeo internacional como tambe riba area di desaroyo di nos producto turistico. Ta gradici e organisacion pa e oportunidad pa a amplia riba e topico importante aki di ‘innovacion’.
