ASA ta informa cu recientemente a biaha bay Hulanda e 3 hobenan Cameron Johnson, Quion Poppen y Jahmani Eisden pa un trainingsstage na e conosido club di futbol profesional S.B.V. Excelsior Rotterdam.
Door di ASA su laso estrechonan cu varios club profesional na Hulanda, nan ta percura pa hobenan cu ta mustra talento extraordinario, disciplina y mentalidad fuerte haya e oportunidad pa un stage hunto cu hungadonan profesional, bou guia di trainers profesional. Cameron Johnson di 10 aña ta medio campo pa Santa Fe cu a sa di demostra abilidad tecnico fuerte. Quion Poppen di 11 aña ta medio campo fisicamente fuerte pa Britannia cu a logra score 35 goals e ultimo temporada di campeonato. Jahmani Eisden di 11 aña ta e mihor keeper di Aruba den categoria U11.
Jahmani ta keeper pa Estudiantes y Selecion Nacional. SBV Excelsior ta un club cu ta existi 115 aña caba, y ta activo den campeonato na nivel di Eredivisie, e nivel mas halto di futbol professional Hulandes. ASA ta sumamente orguyoso di por a representa e 3 talento hobenan aki y ta deseanan hopi exito na Excelsior. Pronto ASA lo duna update di e stage y con a bay cu nos atletanan cu a bay hasi un bunita papel pa Aruba na nivel internacional.
