E problemanan cu a tuma luga durante Arubadag den Broodfabriek, a yama atencion di prensa Hulandes. Regio15.nl ta un di nan cu a haci un cobertura completo con esaki a tuma luga y tin cu bisa, cu esaki ta un sla bao di faha no solamente pa e bishitantenan di e evento, pero tambe pa e organisadornan y mandatarionan presente.
Segun un articulo di regio15.nl, e evento a tuma luga durante gran parti di e dia, pero rond di 7’or y 15 di anochi, e ambiente a bira mas pisa cu a desemboca den varios pelea. E uzo di alcohol di parti di esnan cu a asisti por a hunga un rol den esaki. Oficialnan di siguridad presente a dicidi pa para e fiesta.
Un gran forsa policial a uni pa controla e situacion. A pidi esnan presente pa bandona e luga y bay cas. Mayoria di e presentenan a responde, pero aparentemente dos di nan no a coopera y a keda deteni.
Polis despues a verifica rond, pa sigura cu tur hende a bay cas. Despues di esaki, cu tur cos a trankilisa, polis a bandona e sitio.