Di 25 pa 27 di augustus lo tin e di 23 edicion di ‘Aruba Internacional Pro-Am Golf Tournament’. Esaki lo tuma luga riba e prestigioso cancha di golf di Tierra del Sol Country Club & Spa. Aruba Tourism Authority conhuntamente cu otro patronisadornan ta organisando e evento cu e expertonan di Tierra del Sol Resort & Golf.
E torneo di golf aki ta un torneo masha popular mes internacionalmente specialmente den e paisnan di Latino America.
Promocion pa Aruba
Aruba Tourism Authority ta haci uzo di e evento di golf aki pa promove Aruba den Latino America, Estados Unidos y Europa.
Cu cooperacion di A.T.A. su oficinanan na varios pais, ta organisa diferente torneonan cualificatorio caminda e ganadornan di cada pais ta ricibi e oportunidad di bin hunga e final na Aruba. Tur A.T.A. su oficina di PR den tur mercado ta contribui grandemente y ta haci tur esfuerzo pa promove Aruba den mundo di golf. Pa e torneo aki cada ekipo di golf ta consisti di 5 golfista, 1 profesional y 4 amateur.
Participacion di celebridadnan di Belgica
Pa e di 23 edicion di international pro-am golf tournament, oficina di A.T.A. situa na Hulanda a tuma initiativa pa invita Geert de Vlieger y Karl Vannieuwkerke pa e torneo aki. Sr. de Vlieger ta un futbolista profesional retira procedente di Belgica y el a bira e prome ‘goalkeeper’ durante e torneo mundial di World Cup na aña 2002. Karl Vannieuwkerke ta un reportero di deporte –decendiente di Belgica, pero hopi conoci na Hulanda y na Belgica. Ademas e ta un presentador di television y e ta skirbi buki como tambe e ta skirbi den prensa.
Tierra del Sol
Ta un inmenso placer pa Tierra del Sol un biaha mas ta host e evento aki y ta yuda den e organizacion, conhuntamente cu A.T.A. pa e evento di Aruba International Pro-Am Golf Tournament ta un exito. Durante transcurso di añanan e torneo a demostra su derecho di existencia y ta sigui crece. Den e calendario anual di torneonan di golf cu ta tuma luga na Tierra del Sol, e torneo aki ta den top y anticipacion ta grandi den Caribe.
Ekiponan participando
E aña aki e torneo ta cera cu 28 ekipo en total di e paisnan: Belgica, Bermuda, Brasil, Canada, Colombia, Curaçao, Hulanda, USA, Inglaterra, Venezuela y naturalmente Aruba.
Manera custumber, e hungadonan aparte di hunga golf tin un programa social hopi atractivo cu ta inclui brunch, dinner y fiesta di clausura cu entrega di trofeo na e ganadonan di e torneo 2017.
Aparte di e aporte di Aruba Tourism Authority y Tierra Del Sol, e torneo ta conta tambe cu otro companianan manera: Caribbean Mercantile Bank, Aruba Aloe, Little Switzerland, Maggy’s y Cerbez Presidente.
