Aruba ta cla pa Junior League World Series

Diahuebs merdia Minister Dangui Oduber a ricibi e seleccion di Center League cu a titula campeon di Junior League Latino Americano na Blossoms Restaurant, pa lunch den un ambiente agradabel. E muchanan a keda masha contento ora nan a ricibi nan regalito for di Minister.

E seleccion di Center League encabesa pa Elwin Rincones lo representa Aruba di dia 12 pa 19 di Augustus venidero na Taylor, Michigan, USA den e Junior League World Series. Nos tur ta corda e wega di final emocionante cu e seleccion aki a hunga contra e seleccion di Panama den stadion di Nadi Croes Crismo Angela. Un wega cu caba den extra inning unda cu e seleccion aki nunca a rindi y na final ta logra e victoria cu un score aplastante.

Minister a expresa cu e no tin duda cu e seleccion aki lo haci un tremendo trabao pa pais Aruba, nan a demostra di tin hopi curason y determinacion. Esaki ta e dos yabinan clave pa titula campeon di mundo. A gradici e mayornan, manager y coachnan cu ta duna di nan tempo pa apoya y yuda e muchanan aki den nan desaroyo. Un danki tambe na e delegadonan cu ta compañando e seleccion aki.