Aruba Softball Bond ta hopi orguyoso di su atleta Eldrick Dijkhoff kende a wordo selecta pa Selecion di ful Europa. Eldrick Dijkhoff un atleta cu semper a traha super duro y bendiciona cu talento a wordo gescout den añanan 2012 durante e famoso torneo Champ of the Champs.
Eldrick a wordo invita pa selecion di Hulanda y a competi den Mundialnan na New Zeeland na 2013 y Canada na 2015. Tambe Eldrick a melita den Hoofdorp Pioners y a hunga diferente Super Cub den Europa. Dia 25 pa 30 di Juni ultimo Eldrick Dijkhoff a bolbe sali pa Hulanda pa hunga cu selecion di Hulanda Europees Kampioenschap cual a tuma lugar na Republica Tsjecho na Prague. Eldrick Dijkhoff a termina cu 13 hit cu un averahe di 433 como number 7 riba e tabla di posicion den e 10 mihornan. European Softball Federation hunto cu e federacion Tsjecho a bin cu e idea pa forma un selecion Europeo pa promer biaha den historia unda lo hunga un wega promocional di 10 inning contra e campeon mundial New Zeeland. Tur esaki ta pa promociona y lanta e interes di softball den henter Europa pa cu Mundial Masculino cu lo tuma lugar den 2019 na Tsjechie.
E directiva Europeo hunto cu e technical Staff a selecta e Top 20 esta e 20 mihor hungadornan di henter Europa den e 12 paisnan cu a competi. Di Hulanda a wordo selecta 2 hungador den e Top 20 esta Eldrick Dijkhoff di ( Aruba) y Emeron Lourens ( Curacao). Eldrick cu averahe di 433 y Lourens cu 370. Aruba Softball Bond ta hopi orguyoso cu e logro aki y Eldrick ta bira e promer perlotero den historia di Aruba cu a hunga pa Selecion di Aruba, Selecion di Hulanda y awor a wordo selecta den Selecion di Europa den e 20 mihornan di 12 Paisnan grandi. Dia 2 di September e wega aki lo tuma lugar na Republica Tsjecho mientras cu 3 pa 8 di September lo tin alaves e Men’s European Championship XIV cu 18 equipo compitiendo. Eldrick Dijkhoff den fuerte preparacion pa sali 28 di Augustus proximo pa Hulanda y despues sigui pa Tsjechie pa asina incorpora su mes den Selecion di Europa. Pabien Eldrick Dijkhoff y pabien Aruba Softball Bond cu un logro asina grandi. Exito!!!!
