E di 15 World Miuay Thai Championship 2018, lo tuma luga na Tailandia, dianan 11 te cu 22 di Maart y Aruba lo bay cu 5 bringado. Cuater a clasifica y uno lo bay como prueba pa e campeonato na Mexico cu lo tuma luga na Juni. Aruba tambe lo ta representa pa un referee internacional, cu pa prome biaha lo ta referee pa campeonato mundial. Esaki sigur lo marca historia pa nos pais.
Tin di bisa cu Aruba su atletanan ta den su miho momento den e deporte di Muay Thai Kick Boxing. Aña pasa, Aruba a score den grandi. Devon Hodge lo ta e referee internacional pa Aruba y el a comenta cu esaki lo ta un experiencia unico den tur tempo cu e tin den e deporte aki. E mes tabata practica Muay Thai y nunca el a hay’e cu e oportunidad pa participa den un campeonato di e magnitud aki. Awo e lo bay como referee internacional y representando Caribe y Aruba. Nos mester ta orguyoso cu nos Arubianonan lo bringa y defende nos bandera na un pais manera Tailandia, pasobra no ta ken cu ta por yega eynan pa participa.
Devon Hodge a sigui comenta cu e lo bay haci su maximo pa asina Aruba ta bon representa na Tailandia den e campeonato mundial aki. Un palabra di pabien y tambe danki na Fundacion Lotto pa Deporte, cu a haci esaki posibel pa e delegacion aki bay. Tambe un danki grandi na Papa Dios. Por ultimo Devon Hodge ta desea tur e atletanan hopi exito na Tailandia.
