Aruba a conoce 35 Young Entrepreneurs nobo!

Recientemente den Caya Grandi di Oranjestad a tuma lugar e final event di  Good4TheNeighborhood 2017, Building Entrepreneurs. E evento aki tabata un culminacion di 3 siman intensivo caminda 35 hoben a wordo introduci na e mundo empresarial.

Durante e 3 siman e hobenan mester a bin cu idea di un producto pa asina a desaroy’e y riba e dia final bende e producto na e publico. Global Shapers Oranjestad como partner di e programa Good4theNeighborhood 2017 ta orguyoso di por a traha hunto cu Aruba Bank pa desaroya un programa moderniza pa nos hobenan. Un total di 8 grupo a presenta nan producto den un concepto di pop-up stand den Caya Grandi. Tyson Lopez, miembro di Global Shapers cu a presencia e proceso creativo di e gruponan ta di opinion cu e creatividad di e hobenan a wordo transmiti den nan productonan. E creatividad tabata e fuente y e balor agrega pa e productonan nobo cu nan a presenta. Riba e pop-up day tur cos a culmina cu e realisacion di ocho negoshi nobo, akinan bo ta wak unda e gruponan a huza e conocemento cu a wordo acumula den e 3 siman. Ramsis Arends, Project Leader di Global Shapers ta elabora cu ‘e projecto aki ta algo cu tawata hopi necesario pa nos hoben nan.

Entrepreneurship no ta wordo duna na scol y eta crea habilidadnan cu tur hoben por uza den nan bida diario. No tin nada mas mihor cu wak con tur cos a resulta den practica. Tres punto cu a destaca di e fin di siman ta: 1. Ora un persona a ofrece e hoben nan pa cumpra nan idea/negoshi, 2. Ora un organisacion a hasi un pedido grandi na un di e gruponan pa nan producto y 3. Na final di e dia un di e participante nan a bisa “Aki par di anja bo lo bay tende nomber di mi negoshi”. Momento nan asina ta loke ta hasi cu bo ta realisa e impacto positivo di e trabou hasi.’ Di parti di Global Shapers Oranjestad nos kier a yama danki na tur participante di Good4TheNeighborhood 2017 Building Entrepreneurs como tambe tur persona cu den un forma of otro a asisti na creacion di e programa aki. Un danki special ta bai na Aruba Bank cu a kere den e projecto aki for di comienso y a hasi esaki un realidad. Un danki special ta bai tambe na ARC Digital cu como partner di Global Shapers a asisti den e creacion di e programa y contenido di e projecto aki. Danki tambe ta bay na E. E. Venture, Yabi Consultancy, Cornerstone Economics, Aruba Aloe, Man Cave Barber Lounge, Kamer van Koophandel Aruba, Universidad di Aruba, Erasmus Business Planning y The Vault cu a sostene e projecto.