Aruba como destinacion tin un caracteristica unico, mundialmente nos ta reconoci como hendenan amabel cu ta forma e ‘One Happy Island’ cu ta keda atrae bishitantenan.
E caracteristica intangible aki cu nos ta posee ta algo unico cu ta biba den nos y ta wordo transmiti den e servicio cu nos ta brinda na e bishitante cu ta lage sinti bon bini y na cas na Aruba.
Den e acuerdo di collaboracion entre Aruba Certification Program (ACP) conhuntamente cu Hotel Management School Maastricht (HMSM) e caracteristica aki a wordo identifica como e componente unico di e servicio cu nos ta brinda. Pa e motibo aki ta importante pa nos identifica e caracteristica unico menciona, pa conserve y engrandece pa asina por sigi brinda e servicio autentico aki na nos bishitantenan.
Durante e proceso di eleva y amplia e programa di ACP pa asina por brinda un miho calidad di curso na su participantenan, e team di ACP a para keto y analisa con pa descibri e caracteristica unico aki, cual ta uno cu ta identifica con nos ta biba, mira y experencia nos realidad di tur dia. Nos a bin realisa, cu e caracteristica tin su origen den nos historia, tradicionnan, norma y balornan como tambe influencianan socio-economico cu nos isla a pasa aden. Lamentablemente nos tin cu admiti cu ta nota y sinti cu algun di e caracteristicanan aki ta birando menos dia pa dia, asinaki afectando nos nivel di servicio negativamente. Nos mester percura pa stop e desaroyo negativo aki.
E team di ACP a analisa nos simbolonan nacional y tambe nos historia pa di akinan identifica e balornan tipico Arubiano cu ta hasi nos ken nos ta. A identfica nuebe balor tipico cu ta sobresali serca nos hendenan y cu ta pone nos sinti feliz di ta parti di e comunidad aki. E nuebe balor nan aki ta wordo presenta como nos ‘Zjeito’. E Zjeito Rubiano cu nos tur tin den nos, y cu ta e secreto di Aruba su felisidad. Nos Zjeito ta wordo huza como e liña cora den e programa di certificacion. E Zjeito mester sirbi pa yuda nos reconecta cu nos norma y balornan pa asina aki nos y futuro generacionnan por sigi brinda un mihor servicio autentico na nos bishitantenan.
