Aruba Airlines ta invita Minister di Cultura pa e Gran Marcha di Carnaval na Corsou

Aruba Airlines, como un sponsor principal di Carnaval di Aruba, ta felicita e pueblo di Aruba cu un otro gran Carnaval. Pa di dos aña Aruba Airlines a sponsor nos dushi Carnaval pa medio di e organisacion di Carnaval SMAC kende na su turno a duna Aruba Airlines un bon promocion durante henter e temporada.

Aruba Airlines hunto cu Oficina di Turismo di Corsou, a extende un invitacion na nos Minister di Cultura sra. Xiomara Ruiz-Maduro pa e Gran Marcha di Carnaval na nos hermana isla Corsou diamars 13 di februai como un aprecio pa e participacion cu e Minister a duna na e temporada di Carnaval di Aruba como e mandatario encarga cultura.

Durante e ultimo parada di Carnaval 64, sra. Sandra Sequea di Aruba Airlines den presencia di miembronan di SMAC, a haci entrega di e pasashi na Minister di Cultura.

Aruba Airlines ta gradici SMAC tambe y a regala nan pasashi pa nan tambe por presencia e Gran Marcha di Carnaval na Corsou. E aerolinea a keda satisfecho cu e promocion ricibi di SMAC y ta mira cu anticipacion na un otro temporada di Carnaval otro aña.