Durante e conferencia di prensa di AVP ex Minister di Husticia y aworaki Parlamentario di AVP Arthur Dowers a reacciona riba e forma di proceder di Minister di Husticia Andin Bikker, kende e ta considera e Minister di Inhusticia di Aruba.
“Un cos importante mi ta kere a wordo constata e ultimo dianan aki ta cu pais Aruba lamentablemente no tin un Minister di Husticia. Nos a yega di califica e persona aki como un Minister di Inhusticia.
Bo ta mira hopi cla cu e persona aki no tin e nocion di kico e ta haciendo y culminacion di e ultimo lunanan di desaster tabata e liberacion di un pedofiel,” Dowers a bisa na inicio di e conferencia di prensa di fraccion di AVP den Parlamento.
El a splica cu el a bin ta analisa actuacion di e Minister aki, kende principalmente e ultimo dianan a haya hopi critica y hopi sla for di comunidad pa loke el a haci, y a constata cu di repente a bin pidi disculpa pa e hecho cu el a firma pa laga un Pedofiel den libertad prome cu el a caba di sinta su castigo.
“Mi ta sigur cu el a pidi su disculpa riba instruccion di e “spin dokter” kende mi a mir’e ta cana cun’e na e prizon bieu buscando luga pa cera hende. Spin dokter lo a bis’e bay conferencia di prensa y pidi bo disculpa y e cos aki ta pasa. Pero e cos aki no ta pasa pasobra tin un Minister di Husticia cu pa añanan largo a bisa cu e Minister di Husticia anterior, esta mi persona, no tin un maneho. Pero hustamente e hecho cu nos tabatin un maneho a buta cu nos no ta haci e eror y blundernan cu e ta haci.”
E ta haya lamentabel cu e Minister aki, ora cu e tabata den oposicion, a bisa cu e tin un plan di maneho for di ocho aña pasa, for di tempo cu e tabata den Partido Democracia Real. Cu e tin un Plan di Maneho pa Husticia y cu e lo bin garantisa siguridad na henter e pueblo.
“Mi tin cu bisa cu nos a mira e meneer aki yega y su Plan di Maneho te na e momentonan aki tabata manda cera algun prostituta di barnan na San Nicolas y mi a mire tambe stop hende cu ta kibra piedra; stop Coney Island y aworaki nos ta mira liberacion di un pedofiel.
Esey ta e culminacion di e Plan di Maneho di e Minister di Husticia. Un Minister cu tabatin asina gana di bira Minister cu e no a ni pensa ki cartera e ta tuma, e no a ni pensa si e tabata por atende cu husticia.
Pasobra su tata tabata Abogado y berdad cu el a bringa SETAR den pasado y a logra kibra e monopolio di SETAR, pa kita e tipo di cosnan aki di Handelsrecht.
E no ta un persona cu tin nocion di maneho tampoco nocion di por ehempel kico husticia y strafrecht ta encera y di cual Minister di Husticia tin un parti importante den dje,” Dowers a duna di conoce.
