Departamento di Asuntonan Economico, Comercio y Industria ta anuncia cu dialuna 11 di September, Exprodesk lo habri su portanan oficialmente pa duna consulta, training y workshop na tur compania y empresario cu tin interes pa exporta nan producto y servicio. Meta principal di e export promotion desk ta pa crea mas actividad economico por medio di exportacion di producto y servicionan local.
Cu e crecemento rapido di e economia mundial acompaña pa digitalisacion ta sumamente importante pa probecha di e asercamento virtual di productor y consumidor. Aruba tin e potencial pa expande e cantidad di servicio y producto cu e ta crea localmente. Recientemente, Exprodesk cu financiamento di COSME/Union Europeo, a tene su prome workshop riba e tereno di musica cu concentracion riba e negoshi lucrativo di exportacion di musica. Un cantidad di musiconan y organisacion nan gubernamental y no-gubernamental a participa na e tres dia nan y a ricibi informacion balioso riba e potencial cu exportacion ta nificia pa e industria musical y pa nos pais.
Exprodesk lo ta habri cuminsando diamars 12 di september durante oranan di oficina. Nos ta situa na edificio di Sun Plaza na segundo piso. Por yama na Departamento di Asuntonan Economico Comercio y Industria entre 8 di mainta y 4:30 di atardi di dialuna pa diabierna. Pa mas informacion bishita nos website www.exprodesk.com y sigi nos riba pagina di facebook Exprodesk pa keda al tanto di tur actidivad especialmente e training y workshopnan cu Exprodesk lo ta ofreciendo durante henter aña.
Dialuna awor Minister di Asuntonan Economico y Communication Richard Arends lo ta presente pa oficialmente habri Exprodesk pa publico en general acompaña pa partners di Exprodesk manera IDEA, Free Zone Aruba, Camara di Comercio, ARINA, ATIA, CBA, APA y ADOUANE. Nos ta masha contento y alavez satisfecho cu e acohida cu ja caba Exprodesk a ricibi di publico en general. Esaki ta duna nos sigur e señal cu e empresario local ta wak exportacion como un avenida viabel pa crea mas entrada.
Pa un cita of mas informacion tuma contacto na Exprodesk cu:
Susanne van Nes na: [email protected]
Sharon Meijer na: [email protected]
