Segun AZV, den e caso di Kyrenne Croes por ehempel, minister tabata hopi envolvi. Ringeling tin constantemente contacto cun’e, pa wak ki posibilidadnan por tin toch pa yuda den e caso aki.
Podise pa un poco distancia, ta como si fuera cu e mes no ta worry, nan no a duna suficiente atencion. Pero no ta bay pa esaki actualmente so. Durante tempo cu a pasa, Ringeling a experencia esey cu hopi politico, hopi minister, cu nan ta sinti cu nan mester haci algo, nan ta purba di wak, yuda te asina leu cu por, pero e no ta asina segun ley. No ta e minister ta tuma e decision, sino e organo ehecutivo. Si e pashent no ta di acuerdo cu esey, e por apela e decision cu e organo ta tuma, Ringeling a splica.
Formula
Tin formula, Ringeling a bisa. Ta esunnan cu ta trahando ley mester tuma e decision eynan. E wetgevers, cu ta gobierno y staten. AZV como organo ehecutivo, no por haci esey. El a agrega cu tin discusionnan andando of mester wordo continua cu e minister actual, cu si por ehempel SABA ta wordo poni bao di AZV den sentido cu e servicionan cu SABA ta dunando, incluso di verpleeghuiszorg, pa reactivering y revalidatie y si e cay bao di AZV, e ta wordo cubri bao di AZV, esey por ta un solucion pa tipo di pashentnan manera Kyrenne.
Tin discusion y den esey AZV ta pro, ta kere cu e lo ta bon pa entre otro SABA, e tipo di servicionan ey, bin cay bao di AZV. Den e ley, tempo e ley di AZV a wordo traha, na 2001, den e ley mes, den e memorie van toelichting ta wordo bisa cu Gobierno of e wetgever e tempo ey, ta premira cu dentro di tanto tempo tipo di cuidonan asina por bin cay bao di AZV. No ta un idea nobo. Tin di compronde cu den e prome añanan di AZV, e sistema no tabata suficiente stabilisa, pero den e ultimo añanan tin discusion cu gobierno y ministernan, pa wak si e verpleeghuiszorg, thuiszorg, si nan por bay cay bao di AZV. Si haya un oportunidad pa discuti esaki cu e minister actual, Ringeling ta pensa cu por bay den e direccion ey.
Verpleeghuiszorg
E ta bay pa e tipo di cuido. E servicio di verpleeghuiszorg, mester bay cay bao di AZV. E ora si un pashent mester di e cuido ey, e ora e por hay’e.
