E hobencita Amika Every tin 11 aña, shete di nan e la dedica na gymnasia artistica, y aunke e ta reconoce cu e trajecto no tabata uno fasil, su dedicacion a hibe na enfoca plenamente den e presente cu pa awor ta e Panamericano Hubenil 2018, e proximo aña celebra na Argentina.
“Mi no tabata tin idea cu e deporte aki ta existi na Aruba, mi tabata tin cuater aña ora mi a cuminsa cu turnen. E ta un proceso duro, paso bo tin cu entrena hopi, pero tur e esfuerso tin su resultado y mi ta contento cu tur locual mi a logra te awor”, Amika ta conta. Den menos di dos aña, Amika a desaroya hopi y a pasa fasilmente di nivel 3 USAG pa nivel 6, siendo e gimnasta mas hoben di Aruba cu e nivel di mas halto den historia di gymnasia Arubano.
Amika su carera competitivo a cuminsa na 2015. Amika a participa pa promer biaha na un competencia di gymnasia na nivel internacional na Panama logrando dos medaya di Brons. Na 2016, Amika a participa na tres competencia ganando un total di 11 medaya, di cual cuater tabata medaya di Oro. E la sa di supera e cantidad di premio den 2017, ganando un total di 7 medaya di Oro na seis diferente competencia esakinan na Barbados, Colombia, Panama y Costa Rica banda di 4 otro medaya di Plata y Brons.
Amika a demostra di tin un inmenso potencial pa e deporte di gymnasia, cu bon despleho di forsa den su tumbling. E habilidad aki a yude jega na e titulo maximo di campeon Suramericano di piso. Tambe Amika ta e sub-campeon Suramericano den viga. Pa aña 2018, Amika ta sigui su carera deportivo formando parti di e selection nacional hubenil cu miras pa competi na nivel Panamericano.
