Cu hopi orguyo por anuncia cu Alice van Romondt, hunto cu Piet de Boer di Volendam, hunto cu Hans van der Ven for di Den Haag lo ricibi nan Zilveren Anjer for di man di prinses Beatrix.
Alice van Romondt lo ricibi su Zilveren Anjer pa su contribucion pa cultura, literatura y arte na Aruba. Piet de Boer lo ricibi e distincion aki pa su esfuerso den e Volendams Opera Koor. E ta presidente di esaki. Y por ultimo Hans van der Ven, lo ricibi e anjer pa su aporte cu Rijksmuseum na Amsterdam, pa e adkisicion di obranan di arte cu ta importante pa e patrimonio di Hulanda.
Ta otorga e Zilveren Anjer desde 1950 na personanan cu a base voluntario y sin fin di lucro ta aporta na cultura of naturalesa dentro di Reino. Prinses Beatrix ta otorga e anjernan aki riba dia 30 di Mei den e Palacio Real na Amsterdam.
